ԲՈՐԻՍ ԳԵՎՈՐԳՅԱՆ

2 հունվար, 1938 - 11 հուլիս, 2018

Ծնվել է Երևանում: Պարարվեստում առաջին քայլերն սկսել է 1948թ., Երևանի պիոներների և դպրոցականների քաղաքային պալատում: 1956թ. ծառայել է խորհրդային բանակում: 1957թ. ծառայությունից վերադառնալուց անմիջապես հետո ընդգրկվել է պարարվեստի հայտնի վարպետ Վանյա Ղարիբյանի ղեկավարած Երվանդ Սահարունու անվան երգի-պարի անսամբլի կազմում և կարճ ժամանակ անց դարձել համույթի առաջատար պարողներից մեկը: 1960-63թթ հանդիսացել է Հայֆիլհարմոնիայի մենակատար: 1963թ. հիմնադրել է «Բերդ» պարային համույթը, որը նրա ղեկավարությամբ մասնակցել է Հունաստանում, Լեհաստանում, Կիպրոսում, Բուլղարիայում, Հունգարիայում, Ալժիրում, Ավստրիայում, Ֆրանսիայում, Իտալիայում և մի շարք այլ երկրներում կայացած միջազգային փառատոների, պետական-կառավարական միջոցառումների, հայկական մշակույթի օրերի՝ արժանանալով կառավարական կոչումների, միջազգային պարգևների և գլխավոր մրցանակների: 1976թ. ավարտել է ԽՍՀՄ ՀԱՄԿԽ-ի Լենինգրադի բարձրագույն դպրոցը՝ «Ստեղծագործական աշխատանքների մեթոդիկան պարային կոլեկտիվներում» որակավորմամբ: Հետագա տարիներին «Բերդ» համույթում իրականացրել է բազմաթիվ մնայուն պարային բեմադրություններ: 1995թ-ից եղել է Հայաստանի ազգային պարարվեստի միության վարչության անդամ: Պարգևատրվել է Հայաստանի ազգային պարարվեստի միության «Վահրամ Արիստակեսյան» ոսկե հուշամեդալով: 1990թ. արժանացել է Հայաստանի մշակույթի վաստակավոր աշխատողի կոչման, 2003թ.՝ ՀՀ մշակույթի նախարարության ոսկե մեդալի, 2008թ.՝ Արաբկիրի պատվավոր քաղաքացու կոչման, 2013թ.՝ ՀՀ ժողովրդական արտիստի կոչման: Նույն թվականին պարգևատրվել է նաև Երևանի քաղաքապետարանի և ՀՀ սփյուռքի նախարարության ոսկե մեդալներով, ՀՀ ԱԺ հուշամեդալով: Մահացել է Երևանում: