ԳԵՎՈՐԳ ԽՈՒԴԻՆՅԱՆ

Ծնվել է 1958թ. օգոստոսի 6-ին, Վրաստանի Չանախչի գյուղում։ 1975թ. ավարտել է Ալավերդի քաղաքի Սայաթ-Նովայի անվան միջնակարգ դպրոցը։ 1976-81թթ սովորել է Երևանի պետական համալսարանի պատմության ֆակուլտետում, 1981-84թթ՝ ԵՊՀ պատմության ֆակուլտետի ասպիրանտուրայում։ 1989թ. պաշտպանել է թեկնածուական ատենախոսություն «1870-1880թթ հայ ազգային-ազատագրական շարժման խորհրդային պատմագրությունը» խորագրով։ Մինչև 1995թ. աշխատել է ԵՊՀ պատմության ֆակուլտետում, այնուհետև՝ ՀՀ ԳԱԱ պատմության ինստիտուտում, որի առաջատար գիտաշխատողներից է։ 2005թ. պաշտպանել է դոկտորական ատենախոսություն «Հայ Յեղափոխական Դաշնակցության ձևավորման գործընթացը, գործունեությունը, գաղափարախոսությունը (ակունքներից մինչև 1895թ. վերջերը)» խորագրով։ 2009թ-ից «Վէմ» գիտական հանդեսի խմբագիրն է։ Հեղինակել է շուրջ 100 աշխատություններ (մենագրություններ, հոդվածներ, թեզիսներ): Գիտական հետաքրքրությունների շրջանակում եղել են 19-րդ դարի վերջի և 20-րդ դարասկզբի հայ ազգային-ազատագրական պայքարի, հայ ազգային կուսակցությունների, Հայկական հարցի, հայ հասարակական-քաղաքական մտքի պատմության հիմնախնդիրները: Հրատարակվել են նրա «ՀՅԴ առաջին ընդհանուր ժողովը» (1992թ.), «Հայ Յեղափոխական Դաշնակցության ծնունդը» (2000թ.), «Հայաստանյայց առաքելական եկեղեցին և հայ ազգային կուսակցությունները 1889-1891 թվականներին» (2003թ.) և այլ աշխատություններ: