ՎԱՀԱՆ ԱՐԾՐՈՒՆԻ

Ծնվել է 1965թ. դեկտեմբերի 5-ին, Երևանում: Թատերագետ, արձակագիր Անուշ Ասլիբեկյանի ամուսինն է: 1983-91թթ սովորել է Երևանի Մ.Հերացու անվան պետական բժշկական ինստիտուտում: 1986-92թթ եղել է «Նարեկ» արական երգչախմբի մեներգիչ, 1993-94թթ` «Հայսմավուրք» երգչախմբի արտիստ: 1989-94թթ սովորել է Երևանի Կոմիտասի անվան պետական կոնսերվատորիայում՝ Գոհար Գասպարյանի դասարանում: 1995թ. եղել է Հայաստանի պետական Կապելլայի արտիստ: 1994-96թթ հեղինակել և կազմակերպել է «Գուադեմաուս» 4 երաժշտական փառատոները: 1995-97թթ ծառայել է Հայաստանի Ազգային Բանակում: 1997-2002թթ հեղինակել և վարել է բազմաթիվ հեռուստատեսային և ռադիոհաղորդաշարեր` «Արտ պրոմո», «Վոքս մունդի», «Սաբոտաժ», «Սա մեր հայրենիքն է» և այլն: 2000թ. ստեղծել է «Արծրունի» պրոգրեսիվ-ռոք խումբը: Հանդես է եկել տարբեր երաժշտական ոճերում` կամերային երաժշտությունից մինչ ռոք, էլեկտրոնայինից` սիմֆոնիկ և երգչախմբային: Հեղինակել է 12 վավերագրական ֆիլմերի, 5 անիմացիոն ֆիլմերի, մնջախաղի թատրոնի («Գիրք ծաղկանց»), բալետի («Ներդուրս») և բազմաթիվ ակտուալ արվեստի ակցիաների (Քիմիական անձրև, Չսերտաց դասեր) համար գրված երաժշտություններ: Գրել է երգաշար՝ ասորական արևելքի եկեղեցու պատարագի և սրբազան ծեսերի մշակումներով և Մեսրոպ Մաշտոցի պահպանված 11 շարականների մեկնությամբ: 2003թ. Հայաստանի ազգային երաժշտական մրցանակաբաշխության ժամանակ, նրա «Կոմիտաս` տասը հայտնություն» երկը արժանացել է «Տարվա լավագույն ալբոմ», իսկ 2004թ. ԱՄՆ-ում` «Լավագույն ձևավորում» և «Լավագույն ազգային ալտերնատիվ ալբոմ» մրցանակների: Երաժշտի ձայնասկավառակներն ու տեսասկավառակները հրատարակվել և վերահրատարակվել են ԱՄՆ-ում, Ֆրանսիայում, Ավստրալիայում և Ռուսաստանում: Թողարկել է «Նախաբան» (1991թ.), «Ethnophonica» (1996թ.), «Սա մեր Հայրենիքն է» (1998թ.), «Կոմիտաս. Տասը հայտնություն» (2002թ.), «Live Cuts» (2002թ.), «Cruzaid» (2002թ.), «That’s All Live» (2002թ.), «The Best of 1996-2002» (2005թ.), «Assyrian Way» (2006թ.), «Crusade» (2007թ.), «Sacred Rituals» (2009թ.), «Sacred Episodes» (2009թ.), «Մաշտոց. Սրբազան մարգարիտներ» (2011թ.) սկավառակները: Ակտիվ համերգային գործունեություն է ծավալել Հայաստանում, Ռուսաստանում, Միջին Արևելքում, Եվրոպայում և ԱՄՆ-ում: 2014թ. եղել է «Մելոման քլաբ» հաղորդաշարի հեղինակն ու վարողը, 2016թ.՝ «Տրիո Նուովո» համերգային նախագծի հեղինակը, վոկալիստն ու կիթառահարը, 2017թ.՝ Հայաստանի հանրային ռադիոյի «Երաժշտական եռանկյունի» հաղորդաշարի հեղինակն ու վարողը: 2019թ. ընտրվել է Երևանի Մ.Հերացու անվան պետական բժշկական համալսարանի հոգաբարձուների խորհրդի մախագահ: