ՀՈՎԵՐ ԿԱՄԵՐԱՅԻՆ ԵՐԳՉԱԽՈՒՄԲ

Ստեղծվել է 1992թ. սեպտեմբերին, խմբավար Սոնա Հովհաննիսյանի կողմից, ով այսօր էլ ղեկավարում է երգչախումբը: «Հովեր»-ը բաց է խմբերգային բոլոր ժանրերի համար: Երգչախումբը հանդես է եկել խմբերգային ներկայացումներով, մեծակտավ վոկալ-սիմֆոնիկ, օպերային, կամերային ավանդական և փորձարարական նախագծերով (Կոմիտասյան պարերգերի բեմադրություն, «6 առակ», «Զուգահեռ» խմբերգային ներկայացումներ, «Անուշ» օպերայի ադապտացիա, Վահագն Հայրապետյան տրիոյի հետ համատեղ «Ապարանյան երգերի ոչ ավանդական մշակումներ»): Համագործակցում է ՀՊՖՆ-ի, ԵԿՊՆ-ի, ՀՊԵՆ-ի, «Երևանյան հեռանկարներ», «Ոսկե ծիրան», «Կոմիտասյան», «Արամ Խաչատրյան», փառատոնի և մի շարք այլ հայաստանյան նվագախմբերի, երգչախմբերի և փառատոների հետ: «Հովեր» պետական կամերային երգչախումբը ՀՊՖՆ-ի և Էդուարդ Թոփչյանի հետ համատեղ իրականացրել է տասնյակ օպերաներ («Եվգենի Օնեգին», «Տոսկա», «Գեղջկական պատիվ», «Սևիլյան սափրիչ», «Մադամ Բատերֆլայ», «Պայացներ», «Բոհեմ», «Արծվաբերդ», «Սասունցի Դավիթ», «Կրակե օղակ»): Երգչախմբի ծրագիրը բազմազան է և բազմաբնույթ: «Հովեր»-ը հանդիսանում է հայ կոմպոզիտորների մի շարք ստեղծագործությունների ստեղծման նախաձեռնողն ու առաջին կատարողը (Վ.Շարաֆյան, Ա.Ավանեսով, Ա.Ազիզյան, Ս.Երկանյան, Ե.Երկանյան, Ս.Բաբաթորոսյան և այլք): Երգչախումբը ձայնագրել է 7 ձայնասկավառակ, մասնակցել է «Արարատ» (2002թ.), «Արտույտների ագարակը» (2007թ.), «Նամուս» (2005թ.), «Թևանիկ» (2014թ.), «Խոստում» (2017թ.) գեղարվեստական ֆիլմերի, «Պեպո» ներկայացման (երաժշտ.՝ Վ.Շարաֆյան) երաժշտական աշխատանքներին: Երգչախումբը համերգներով հանդես է եկել Իտալիայում, Ֆրանսիայում, Մեծ Բրիտանիայում, Գերմանիայում, Ավստրիայում, Ռուսաստանում, Լեհաստանում, Թայվանում, Բելգիայում, Էստոնիայում, Լիտվայում, ԱՄՆ-ում, Լիբանանում, Շվեյցարիայում, Սլովենիայում: Մասնակցել է մի շարք միջազգային երգչախմբային մրցույթ-փառատոների Արեցցոյում, (Իտալիա), Տուրում (Ֆրանսիա), խմբերգային օլիմպիադաի Լինցում (Ավստրիա), հոգևոր երաժշտության փառատոների. «Gaude Mater», «Logos» (Լեհաստան), «Festival van Vlaanderen» (Բելգիա) և «Les Sacrees Journees» (Ֆրանսիա), Վալերի Գերգիևի Զատկի փառատոնի (Ռուսաստան), «Polyfollia» (Ֆրանսիա) և «La Fabbrica del Canto» (Իտալիա) պրոֆեսիոնալ երգչախմբերի ստուգատես-փառատոների, «MustonenFest» (Էստոնիա), «Ludwig van Beethoven Easter Festival» (Լեհաստան), «MIDEM» (Ֆրանսիա), «Beiteddine Art Festival» (Լիբանան), «The International Music Festival of Sion Valais» (Շվեյցարիա), «Emilia-Romagna» (Սլովենիա), «Südtirol» (Իտալիա), «RheinVokal festival» (Գերմանիա), «Просветитель» (Վալաամ) միջազգային փառատոների: Հանդես է եկել «Teatro Dal Verme» (Իտալիա), «Тhéâtre Nanterre-Amandiers», «Cité de la Musique», «Le Quartz» (Ֆրանսիա), «Strathmore Hall», «Carnegie Hall» (ԱՄՆ), «Lincoln Center-Alice Tully Hall» (ԱՄՆ) հեղինակավոր դահլիճներում: Ս.Գուբայդուլինայի, Ռ.Շչեդրինի, Ք.Պենդերեցկու, Գ.Կանչելիի և մի շարք այլ կոմպոզիտորների ստեղծագործությունների «Հովեր»-ի կատարումները արժանացել են բարձր գնահատականների: «Հովեր» կամերային երգչախումբը հանդես է եկել մի շարք մեծանուն երաժիշտների և կոմպոզիտորների հետ (Գ.Կրեմեր, Ա.Մուստոնեն, Ռ.Շերվենիկաս, Դ.Գերինգաս, Ջ.Նելսոն, Մ.Կլաուզա, Բ.Կուտավիչյուս, Լ.Շամբադալ, Ֆ.Հելգաթ): 2009թ. երգչախմբին շնորհվել է պետական կարգավիճակ: 2011թ-ից «Հովերը» ակտիվորեն աշխատում է կամերային երաժշտության ազգային կենտրոնի կազմում: Իր գործունեության 20-ամյակի առիթով «Հովեր» կամերային երգչախումբը պարգևատրվել է ՀՀ մշակույթի նախարարության ոսկե մեդալով: 2017թ. արժանացել է «Ծիծեռնակ» մրցանակաբաշխության «Լավագույն նախագիծ» մրցանակին: 2013թ-ից «Հովեր» պետական կամերային երգչախմբի գլխավոր հովանավորությունը ստանձնեց «ՎիվաՍել-ՄՏՍ» ընկերությունը, ինչը երգչախմբի համար նոր, կարևորագույն փուլ հանդիսացավ` խթանելով նրա ստեղծագործական գործունեությանը, պայմաններ ստեղծելով իր մտահղացումների և ծրագրերի լիարժեք և բազմակողմանի իրագործման համար: 2017թ-ից երգչախմբի բարեկամների շրջանակը համալրվեց «IDeA» մարդասիրական նախաձեռնության գործընկերությամբ: