ՀՈՎՀԱՆՆԵՍ ՓԻԼԻԿՅԱՆ

15 ապրիլ, 1942 - 22 դեկտեմբեր, 2018

Ծնվել է Իրաքի Մոսուլ քաղաքում: 1963թ. ավարտել է Բեյրութի Ամերիկյան համալսարանը, ապա հետևել Մյունխենի համալսարանի, Լոնդոնի դրամատիկական արվեստի թագավորական ակադեմիայի դասընթացներին։ Եվրիպիդեսի «Էլեկտրա» (1971թ., Գրինվիչի թատրոն) և այլ բեմադրություններով ճանաչվել որպես հունական դասական ողբերգության ինքնատիպ մեկնաբան։ Բեմադրել է նաև Ռասինի «Ֆեդրա», Սոֆոկլեսի «Էդիպ արքա», Շեքսպիրի «Լիր արքա» (Իսլանդիա), Շիլլերի «Ավազակներ» (Գերմանիա), Էսքիլեսի «Ագամեմնոն» և այլ (շուրջ 40) պիեսներ։ Զբաղվել է թատրոնի պատմության և տեսության, հայ մշակույթի հարցերով, կատարել թարգմանություններ։ Նրա ջանքերով Անգլիայում (1981թ.), Վենետիկում (1983թ.) և Ֆրանսիայում (1983թ.) անց է կացվել հայկական ֆիլմերի տասնօրյակ՝ նպաստելով հայ կինոյի միջազգային ճանաչմանը։ 1985թ. արժանացել է Հայաստանի մշակույթի նախարարության «Պետրոս Ադամյան» մրցանակի: Մահացել է Լոնդոնում: