ԱԴՈ ԱԴՈՅԱՆ

1 սեպտեմբեր, 1905 - 20 մայիս, 1988

Ծնվել է Արևմտյան Հայաստանի Վանի նահանգի Հայոց Ձոր գավառի Խորգոմ գյուղում։ Եղել է գեղանկարիչ Արշիլ Գորկու հորեղբոր որդին: 1929թ. ավարտել է Անդրկովկասյան կոմունիստական համալսարանը։ 1935-36թթ սովորել է Մոսկվայի Համաշխարհային տնտեսության և համաշխարհային քաղաքականության կարմիր պրոֆեսուրայի ինստիտուտում։ 1929-34թթ վարել է կուսակցական պատասխանատու պաշտոններ Ղափանում (այժմ՝ Կապան), Գորիսում, ՀԿ(բ)Կ Կենտկոմում։ 1956թ-ից եղել է ՀԿԿ Կենտկոմի «Լենինյան ուղիով» տեսական-քաղաքական ամսագրի խմբագիրը։ 1959-71թթ եղել է Հայաստանի Գերագույն Խորհրդի պատգամավոր։ Տպագրել է բարոյագիտական, քաղաքական, սոցիոլոգիական, հայագիտական հոդվածներ և «Սիրո և ընտանիքի էվոլյուցիան» գիրքը (հ.1-2, 1967-72թթ, 1990թ.)։ 1967թ. արժանացել է Հայաստանի մշակույթի վաստակավոր գործչի կոչման: Մահացել է Երևանում: