ԳԵՈՐԳԻ ԹՈՎՄԱՍՅԱՆ

14 դեկտեմբեր, 1936 - 21 ապրիլ, 2011

Ծնվել է Վրաստանի Մառնեուլի շրջանի Սադախլո գյուղում: Բնակվել է Կիրովականում (այժմ՝ Վանաձոր)։ Ուսուցանել է կերպարվեստ նախ միջնակարգ դպրոցում, ապա Կիրովականի Պոլիտեխնիկական և Մանկավարժական ինստիտուտներում: 1963թ. ավարտել է Մոսկվայի գեղարվեստի ինստիտուտը: Նկարչի ռեալիստական գործերում իշխում են սառը և տաք գույների հակադրումները: Աշխատանքներից են՝ «Որդեկորույս մայրեր» (1985թ.), «Վեհափառ Վազգեն Ա-ի դիմանկարը» (1985թ.), «Մերժված տենչեր» (1995թ.), «Մենք ենք, մեր սարերը» (1996թ.), «Արտիստը» (2003թ., Մհեր Մկրտչյանի դիմանկարը), «Հավատքի կանթեղներ» նկարաշարը (1996-2000թթ) և այլն: 1976թ-ից եղել է Հայաստանի նկարիչների միության անդամ: Անհատական ցուցահանդեսներ է ունեցել Վանաձորում (1970թ.), Երևանում (1988թ., 1997թ.), խմբակային՝ Լոս Անջելեսում (1979թ.): 1969թ-ից դասավանդել է Վանաձորի Հ.Թումանյանի անվան մանկավարժական ինստիտուտում, որտեղ եղել է արվեստի ամբիոնի վարիչը (1998թ-ից՝ պրոֆեսոր): Արժանացել է մի շարք մրցանակների, շքանշանների: Մահացել է Մոսկվայում: