ԱԼԼԱ ԼԵՎՈՆՅԱՆ

Ծնվել է 1975թ. հունիսի 26-ին, ՀՀ Արարատի մարզի Ավշար գյուղում: 1992թ. ավարտել է տեղի միջնակարգ դպրոցը: Զուգահեռ 11 տարի սովորել է արվեստի երաժշտական դպրոցի դաշնամուրային բաժնում և հաճախել է Երևանի գրողների միության «Պիոներ կանչ» թերթի «Բողբոջ» խմբակ, որտեղ տպագրվել են նրա բանաստեղծությունները: Դպրոցական տարիներին հաճախել է բազմաթիվ մանկական կոմպոզիցիայի, երաժշտական, նկարչական, սպորտային խմբակներ: 1993թ. այցելել է «Արձագանք» ստուդիա, որտեղ մասնակցել է ամենամսյա «Բոհեմ» մրցույթ-փառատոնին` իր հեղինակած «Օտարական» և «Վերադարձիր» երգերով և արժանացել 1-ին մրցանակի: 1994թ. իր հեղինակած «Կգտնեմ» երգով մասնակցել է ամենամյա «Ասուպ» մրցույթ-փառատոնին և դարձել մրցանակակիր, որից հետո ընդունվել է Հայաստանի Երգի պետական թատրոն: 1997-99թթ «Ես եմ», «Հայաստան», «Հոյնար» երգերով մասնակցել է «Այո» մրցույթ-փառատոներին և 3 տարի անընդմեջ հաղթել: 1999թ-ից ունեցել է բազմաթիվ համերգներ և մենահամերգներ Հայաստանում և արտերկրում: 2003-07թթ սովորել է Երևանի Կոմիտասի անվան պետական կոնսերվատորիայի ջազ-էստրադային բաժնում: Աշխատել է նաև Հայաստանի հանրային ռադիոյում և ունեցել է սեփական հաղորդումը: Արժանացել է բազմաթիվ մրցանակների արտերկրում և Հայաստանում` «Լավագույն երգչուհի», «Լավագույն ժողովրդական երգչուհի», «Լավագույն երգ, ձայնասկավառակ» և այլն: 2008թ-ից հանդիսանում է ՄԱԿ-ի Յունիսեֆի Բարի Կամքի դեսպանը Հայաստանում: Նաև հանդիսանում է ՀՀ ոստիկանությանը կից հասարակական խորհրդի անդամ: Արժանացել է Ֆ.Նանսենի անվան շքանշանի, ՀՀ մշակույթի նախարարության, ՀՀ ՊՆ «Վազգեն Սարգսյան» ոսկե մեդալների: Թողարկել է «Հայաստան» (2000թ.), «Մշո աղջիկ» (2002թ.), «Գնամ հասնեմ» (2003թ.), «Մարալ, մարալ» (2005թ.), «Հավաքածու» (2008թ.), «Ճանապարհ» (2014թ.) ձայնասկավառակները, երկու տեսասկավառակ՝ Հայոց բանակի 15-ամյակին նվիրված մենահամերգ (2009թ.), ստեղծագործական գործունեության 20-ամյակին նվիրված մենահամերգ (2014թ.): Նկարահանել է շուրջ 20 տեսահոլովակ: 2011թ. արժանացել է Հայաստանի վաստակավոր արտիստի կոչման: