ՀՈՎՀԱՆՆԵՍ ՈՍԿԵՐԻՉՅԱՆ

Դերասան

Ծնվել է 1928թ. մայիսի 6-ին, Եգիպտոսի մայրաքաղաք Կահիրեում: Վաղ տարքից ունեցել է սեր դեպի բեմը: Կահիերում առաջին բեմուսույցները եղել են Խաչիկ Սանտալչյանը, Միքայել Միքայելյանը, Արաքսի Օհանյանը: Առաջին բեմելը եղել է 1940թ., երբ ուսանել է Կահիրեի հոգևոր դպրոցում: Միջին Արևելքի բազմաթիվ բեմահարթակների վրա (Եգիպտոս, Սիրիա, Լիբանան և այլն) խաղացել է տարբեր թատերախմբերի ներկայացումներում՝ «Գիքորը», «Թշվառները», «Շողոքորթն», «Ստվերի մեջ», «Որբուհին», «Ես մարդ էի», «Կարամազով եղբայրները», «Աս էր, թե ան էր», «Սայաթ-Նովա», «Արտիստը» և այլն: Մարմնավորել է 50-ից ավելի կերպարներ: 1966թ. տեղափոխվել է ԱՄՆ, որտեղ շարունակել է բեմական գործունեությունը՝ համագործակցելով ԱՄՆ-ի և Կանադայի հայկական թատերախմբերի հետ: Համազգայինի Հայ կրթական և մշակութային միության թատրոնի հետ 1991թ. Երևանում, Գյումրիում և Վանաձորում մասնակցել է Սփյուռքահայ թատրոնների փառատոնին: Համագործակցել է նաև Հ.Բ.Ը.Մ. «Արտաշատ», «Թեքեյան» մշակութային միության «Մհեր Մկրտչյան», Նյու Յորքի «Վլադիմիր Քոչարյան» և այլ թատերախմբերի հետ՝ մարմնավորելով շուրջ հինգ տասնյակի հասնող բեմական կերպարներ:  Խաղացել է «Վարդանանք» (Ղևոնդ Երեց), «Փառքի վաշխառուները» (Պերլո), «Սողոմոն Թեհլերյան» (Father Luke), «Աղոթքիս մի խառնվիր» (Մանուկ), «Մորգանի խնամին» (Մենթոև), «Ատամնբույժն արևելյան» (Մարկոս) և այլ ներկայացումներում: Իր տիկնոջ, բանաստեղծուհի, արձակագիր և թարգմանիչ Թերեզ Ճապրայան-Ոսկերիչյանի հետ զբաղվել է նաև հրատարակչական գործունեությամբ:  1978թ. Նյու Յորքում հիմնադրել են «Ոսկետառ» հրատարակչությունը՝ հրատարակելով ավելի քան երկու հարյուր անուն պարբերաթերթեր, տարեցույցեր, մանկական և այլ գրական ստեղծագործություններ: 2015թ. Երևանում, Գյումրիում և Վանաձորում մարմնավորել է Վարդան Կարապետի կերպարը, Նյու Յորքի «Վլադիմիր Քոչարյան» թատերախմբի  «Հոգիս ձեզմով կխայտա» ներկայացման մեջ՝ նվիրված Հայոց Ցեղասպանության (1915թ.) 100-ամյակին, որի համար «Սփյուռքում 75-ամյա ստեղծագործական գործունեության, հայ մշակույթի պահպանմանն ու զարգացմանը նպաստելու, հայապահպանության գործում ներդրած բացառիկ ավանդի համար» պարգևատրվել է ՀՀ սփյուռքի նախարարության «Վիլյամ Սարոյան» մեդալով և Հայաստանի թատերական գործիչների միության ոսկե մեդալով: Բնակվում է ԱՄՆ Ֆիլադելֆիա քաղաքում:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար