ՍՏԵՓԱՆ ԱՂԱՋԱՆՅԱՆ

16 դեկտեմբեր, 1863 - 13 դեկտեմբեր, 1940

Ծնվել է Շուշիում: 1872-84թթ սովորել է Շուշիի թեմական դպրոցում, ռուսական ռեալական ուսումնարանում, 1886-90թթ` Մարսելի նկարչական ստուդիայում, 1897-1900թթ` Փարիզի Ժյուլիեն ակադեմիայում: 1900թ. Շուշիում ստեղծել է հոր և մոր դիմանկարները: 1902-04թթ աշխատել է Բաքվում, ապա տեղափոխվել Դոնի Ռոստով, որտեղ մինչ 1921թ. ստեղծագործել և նկարչություն է դասավանդել հանրակրթական դպրոցներում ու պետական նկարչական ստուդիայում: Այդ շրջանի նրա լավագույն գործերից են` «Նկարչի քրոջ աղջիկը», «Մարուսյան», «Ս.Ե.Էքմեքչյանի դիմանկարը», «Ինքնանկար», «Մտորումներ», «Տիկին Խաչատրյանի դիմանկարը», «Երեխայի գլուխը», «Գլխարկով տղան», «Տղայի դիմանկարը»: Ստեղծել է նաև բազմաթիվ բնանկարներ` «Տեսարան Ղարաբաղից», «Կտուրներ. Դոնի Նախիջևան» և այլն: 1921թ. տեղափոխվել է Երևան: 1922-29թթ դասավանդել է Երևանի գեղարվեստաարդյունաբերական տեխնիկումում (այժմ` Փ.Թերլեմեզյանի անվան գեղարվեստի ուսումնարան): Վերջին շրջանի լավագույն գործերից են` «Նկարչի կինը», «Վասիլը», «Նկարչի քույրը», «Գրող Էմին Տեր-Գրիգորյանը», «Ղարաբաղցի կինը», «Կոմպոզիտոր Անուշավան Տեր-Ղևոնդյանը», «Կարմիր բանակայինը», «Դերասանուհի Ե.Վ.Բարոնկինայի դիմանկարը», «Բլանշը» և այլ դիմանկարներ: 1938թ. արժանացել է Հայաստանի ժողովրդական նկարչի կոչման: Մահացել է Երևանում: