ԿԱՐԱՊԵՏ ՄԻՆԱՍՅԱՆ

22 մարտ, 1908 - 24 հունվար, 1966

Ծնվել է Արևմտյան Հայաստանի Կարս քաղաքում: 1925-29թթ սովորել է Թիֆլիսի գեղարվեստի ակադեմիայում, 1931-36թթ` Լենինգրադի գեղանկարչության, քանդակագործության և ճարտարապետության ինստիտուտում: 1936-38թթ եղել է Լենինականի պետական դրամատիկական թատրոնի գլխավոր նկարիչը: 1938-44թթ աշխատել է Երևանի Ստանիսլավսկու անվան ռուսական թատրոնում, հայրենական մեծ պատերազմից հետո` Երևանի Գ.Սունդուկյանի անվան դրամատիկական ու Ա.Սպենդիարյանի անվան օպերայի և բալետի թատրոններում: Ստեղծագործություններին բնորոշ է ծավալատարածական լուծումը, բեմական գործողության բովանդակությանը համահնչուն միջավայրի արտահայտիչ մեկնաբանումը: Ձևավորել է բազմաթիվ ներկայացումներ` Վ.Շեքսպիրի «Վենետիկի վաճառականը» կատակերգությունը (1940թ.), Գունոյի «Ռոմեո և Ջուլիետ» (1955թ.), Ա.Տիգրանյանի «Դավիթ Բեկ» (1952թ.) օպերաները, Գ.Եղիազարյանի «Սևան» բալետը (1956թ.) և այլն: Հեղինակ է նաև դիմանկարների։ 1956թ. արժանացել է Հայաստանի արվեստի վաստակավոր գործչի կոչման: Մահացել է Երևանում: