ԳՈՀԱՐ ԳԱԼՍՏՅԱՆ

Ծնվել է 1964թ. մայիսի 26-ին, Երևանում: 1981թ. ավարտել է Երևանի Ե.Չարենցի անվան միջնակարգ դպրոցը: 1981-86թթ սովորել է Երևանի պոլիտեխնիկական ինստիտուտի կիբերնետիկայի բաժնում, 1982-85թթ` նույն բուհի հասարակական մասնագիտությունների` անգլերեն լեզվի տեխնիկական թարգմանության բաժնում: 1997թ-ից աշխատում է Երևանի Ե.Չարենցի անվան գրականության և արվեստի պետական թանգարանում` որպես գրական բաժնի ավագ գիտաշխատող: Հեղինակել է 6 գիրք, մամուլում տպագրված տասնյակ հոդվածներ և էսսեներ: 2004թ-ից Հայաստանի գրողների միության անդամ է: 2000թ. լույս է տեսել նրա առաջին ժողովածուն` «Կյանք կոչվող փոքրիկ այս ակնթարթը» վերնագրով, որտեղ զետեղված են բանաստեղծություններ և «Ադամամութից մինչև լուսաբաց» պատմվածքը: Հետագայում տպագրվել է նրա «Խորաններ» (2002թ.), «Խորաններից անդին» (2004թ.), «Ջրօրհնության կարգով» (2008թ.) և «Եռման հրվանդան» (2010թ.) գրքերը: Հեղինակել է նաև մի շարք վերլուծական հոդվածներ, տասնյակ երգերի տեքստեր: Նրա բանաստեղծական շարքերը և պատմվածքները պարբերաբար տպագրվել են ինչպես Հայաստանի, այնպես էլ արտերկրի հայկական հանդեսներում: Հեղինակել է «Նռան հատիկ» մանկական թատերական փառատոնի հիմնի երաժշտությունը և խոսքերը: 2009թ. «Նարցիս» հանդեսում տպագրվել է նրա «Մարի Նվարդ» մոնոդրամը, որը 2003թ. մասնակցել է «Արմմոնո» թատերական փառատոնին: 2010թ. կազմել է «Տերյան և արդի բանաստեղծներ - Մթնշաղի կամուրջներ» ժողովածուն: 2013թ. նրա «Տանիքի դարպասներ» գիրքն արժանացել է ՀԳՄ «Հրանտ և Մանուշակ Սիմոնյաններ» գրական մրցանակի։