ԳԱԲՐԻԵԼ ԱՐՈՒ

28 հունվար, 1909 - 12 փետրվար, 1982

Գաբրիել Արուտչյան, Արուչև

Ծնվել է Նոր Նախիջևանում (այժմ՝ Դոնի Ռոստով): Եղել է նկարիչներ Միքայել և ՍերգեյԱրուտչյանների հորեղբոր տղան: Սովորել է ծննդավայրի ռուսական դպրոցում: 1919թ. խորթ հոր` մաթեմատիկոս Երվանդ Քողբեթլյանցի հետ տեղափոխվել է Երևան: Կարճ ժամանակ մնալով Երևանում` 1920թ. մեկնել է արտասահման: 1921թ. բնակություն է հաստատել Փարիզում, որտեղ 1930թ. ավատել է Սորբոնի համալսարանի բանասիրական ֆակուլտետը և նվիրվել գրականությանը: Գրել է վեպեր, պատմվածքներ, պիեսներ, ռուսերենից կատարել թարգմանություններ: 1942թ. հրատարակել է «Օրփեոս կամ հրաշքի սարսափը» պիեսը, որը հաջորդ տարի բեմադրվել է Փարիզում: Պիեսը 1942թ. Նիցցայում արժանացել է առաջին մրցանակի: Երկրորդ համաշխարհային պատերազմի տարիներին ապրել է Ֆրանսիայի հարավում, մտել է «Մոխրագույն վարագույր» թատերախումբ, միաժամանակ աշխատել է որպես փայտահատ: 1948թ. բեմադրվել է «Պոլին կամ Ծովային փրփուրը» պիեսը: Ավելի մեծ հաջողություն է ունեցել «Գոգ և Մագոգ» պիեսը, որը չորս տարի շարունակ բեմադրվել է Փարիզի թատրոններում: Գրել է մի շարք կինոսցենարներ, Ֆ.Դոստոևսկու «Ոճիր և պատիժ» վեպը վերածել է պիեսի, որը բեմադրվել է Փարիզում և Լոնդոնում: Գրել է «Այդ տարօրինակ կենդանին» (1966թ., ըստ Ա.Չեխովի) պիեսը, որը բեմադրվել է Ֆրանսիայում, Իսպանիայում, Իտալիայում: Աշխատակցել է ֆրանսիական «des Maturins», «de Paris», «Saint-Georges» թատրոնների հետ: Կինեմատոգրաֆիայում գործակցել է Ալեքս Ժոֆֆեի, Կ.Օտան-Լարայի, Մ.Ալլեգրեի և այլոց հետ: 1978թ. արժանացել է Ֆրանսիայի գրողների և դրամատուրգների մրցանակի, 1981թ.՝ Ֆրանսիական թատրեական ակադեմիայի մրցանակի (Գրան Պրի): Մահացել է Փարիզում: