ՀԵՆՐԻԿ ԲԱԽՉԻՆՅԱՆ

Գրականագետ, թարգմանիչ

Ծնվել է 1948թ. փետրվարի 16-ին, Թբիլիսիում: 1965թ. ավարտել է տեղի թիվ 92 դպրոցը։ 1963թ. «Սովետական Վրաստան» օրաթերթում տպագրվել է նրա առաջին բանաստեղծությունը: 1965-70թթ սովորել է Երևանի պետական համալսարանի բանասիրական ֆակուլտետի հայոց լեզվի և գրականության բաժնում, 1970-73թթ` ՀՀ ԳԱ Մ.Աբեղյանի անվան գրականության ինստիտուտի ասպիրանտուրայում։ 1970-2006թթ աշխատել է նույն ինստիտուտի հայոց հին և միջնադարյան գրականության բաժնում: 1974թ. պաշտպանել է թեկնածուական ատենախոսություն` «Հայկական ձեռագրերի հիշատակարաններ» թեմայով, 1989թ.` դոկտորական ատենախոսություն` «Սայաթ-Նովա. կյանքը և գործը» թեմայով։ Երկերից են նաև` «Հայ միջնադարյան գրականություն. Համառոտ պատմություն» (համահեղինակներ` Վ.Նալբանդյան, Վ.Ներսիսյան, 1986թ.), «17-18-րդ դարերի հայ գրականությունը» (1999թ.), «Պաղտասար Դպիր. Տաղեր» (1999թ.), «Դրվագներ ֆրանսիական գրականության պատմության» (2004թ.), «15-րդ դարի հայ գրականությունը» (2004թ.), «Հայ միջնադարեան գրականություն» (2006թ.), «Սայաթ-Նովա։ Կյանքը և գործը» (2010թ.), «Շարականի գրապատմական ուղին» (2012թ.) և այլն: 1976-80թթ աշխատել է Երևանի Գ.Սունդուկյանի անվան ազգային ակադեմիական թատրոնում` որպես գրական մասի վարիչ։ 1981-83թթ ֆրանսիական միջնադարյան գրականություն է դասավանդել Երևանի պետական համալսարանում: 1992-2011թթ եղել է Երևանի Ե.Չարենցի անվան գրականության և արվեստի թանգարանի տնօրենը։ 1995թ. և 2005թ. ՀՀ Ֆրանսիայի դեսպանատան կողմից գործուղվել է Փարիզ` մասնակցելու ֆրանսերենի թարգմանիչներ հատուկ ծրագրին: 2002թ-ից Հայաստանի գրողների միության անդամ է: Զբաղվել է նաև թարգմանչական աշխատանքով: 1975-99թթ կազմել և տպագրել է մեկ տասնյակից ավելի թարգմանական գրքեր: Կազմել է շարականների, Գրիգոր Նարեկացու գանձերի ու տաղերի, Սայաթ Նովայի խաղերի, Ներսես Շնորհալու ժամերգերի, Պաղտասար Դպիրի, Գրիգորիս Աղթամարցու, Կոստանդին Երզնկացու չափածո երկերի ժողովածուներ։ Հեղինակել է 9-րդ (10-րդ) դասարանի «Հայ գրականություն»՝ 1993թ-ից բազմիցս վերահրատարակված դասագիրքը (միջնադարյան գրականության բաժին)։ Ֆրանսերենից թարգմանել է Նիկոլա Բուալոյի «Քերթողական արվեստ» (1980թ.), Շառլ Բոդլերի «Չարի ծաղիկներ» (1990թ.), «Էսթետիկա, քննադատություն» (1999թ.), Պոլ Վեռլենի «Ընտիր բանաստեղծություններ» (1995թ.), «Ռոլանդի երգը» (1995թ.), Ալֆրեդ դը Վինյիի «Էլոա և այլ քերթվածներ» (1999թ.), Էժեն Դելակրուայի «Երկեր արվեստի մասին» (2006թ.) և այլ գրքեր: Հրատարակվել են նրա «Մեսրոպ Մաշտոց, Սահակ Պարթև «Օրհներգեր» (2010թ.), «Մովսէս Խորենացի, Ստեփանոս Սիւնեցի, Յովհան Մանդակունի «Օրհներգեր» (2011թ.), «Ներսէս Շնորհալի «Ժամերգեր» (2012թ.), «Օրհներգեր. 7-11-րդ դարեր» (2013թ.), «Սայաթ-Նովայի բանաստեղծական ժառանգությունը» (2016թ.), «Գրիգոր Նարեկացու գանձարանը» (2016թ.) ուսումնասիրությունները (բոլորը՝ գրաբար և աշխարհաբար): 2008թ. արժանացել է ՀՀ մշակույթի նախարարության ոսկե մեդալի և ՀԳՄ «Գրական վաստակի համար» մեդալի, 2010թ.՝ «Ֆրիտյո‎ֆ Նանսեն» ոսկե հուշամեդալի, 2014թ.՝ ՀՀ սփյուռքի նախարարության «Վիլյամ Սարոյան» հուշամեդալի:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար