ԵՐՎԱՆԴ ԵՐԿԱՆՅԱՆ

Կոմպոզիտոր

Ծնվել է 1951թ. նոյեմբերի 5-ին, Լենինականում (այժմ՝ Գյումրի): Դաշնակահար, դիրիժոր Սեդրակ Երկանյանի եղբայրն է, երաժշտագետ Աննա Արևշատյանի ամուսինը: 5 տարեկան հասակից հաճախել է ջութակի դասերի: 1970թ. տեղափոխվել է Երևան: 1975թ. ավարտել է Երևանի Կոմիտասի անվան պետական կոնսերվատորիայի Գրիգոր Եղիազարյանի կոմպոզիցիայի և Հակոբ Վարդանյանի ջութակի դասարանները: 1978թ. ավարտել է նաև ասպիրանտուրան` պրոֆեսոր Գրիգոր Եղիազարյանի ղեկավարությամբ: 1975թ-ից դասավանդում է Երևանի կոնսերվատորիայում (2013թ-ից՝ պրոֆեսոր): 1987-94թթ եղել է հայկական հնագույն երաժշտության «Տաղարան» անսամբլի գեղարվեստական ղեկավարն ու դիրիժորը, որի ժամանակ մշակել է ավելի քան 150 հոգևոր և շուրջ 200 ժողովրդական, քաղաքային, հայրենասիրական երգեր: 1995թ-ից եղել է Բեյրութի «Գուսան» երգչախմբի, 1996թ-ից՝ իր հիմնադրած «Հայաստան» նվագախմբի, 1999թ-ից՝ ջութակահարների և հնագույն երաժշտության «Մադրիգալ» անսամբլի գեղարվեստական ղեկավարն ու դիրիժորը, 2000-07թթ՝ «Բարսեղ Կանաչյան» երաժշտանոցի տնօրենը: Նրա գործերը հնչել են ԱՄՆ-ում, Ֆրանսիայում, Անգլիայում, Շվեդիայում, Ֆինլանդիայում, Ռուսաստանում, Հունգարիայում, Արգենտինայում, Լիբանանում և այլուր: Հեղինակել է «Շուշանիկ» (1981թ.), «Կայսրը» (2008թ.) օպերաները, «Մոկաց Միրզա» բալետ-օպերան (1978թ.), «Վահագնի ծնունդը» խորեոգրաֆիկ կանտատը (1987թ.), «Օրեստ» (1974թ.), «Էդիպ արքա» (1976թ.) բալետները, «Ինքնադիտողություն» (1977թ.), «Հայկ և Բել» (1978թ.), «Ձայն նահատակաց» (1982թ.), «Նեմեսիս» (1994-95թթ), «Խաչված երազներ» (2011թ., 2014թ., 2017թ.) սիմֆոնիաները, սոնատներ դաշնամուրի համար համար 1 և 2 (1975-80թթ), Ջութակի և դաշնամուրի համար (1971թ.), Ֆլեյտայի և դաշնամուրի համար (1978թ.) և այլ երկեր: 1993թ. պարգևատրվել է Մեծի Տանն Կիլիկիո «Սուրբ Մեսրոպ Մաշտոց» շքանշանով` հայկական հոգևոր երաժշտության տարածման ու պահպանման համար: 2007թ. արժանացել է «Համազգային» հայ կրթական և մշակութային միության շքանշանին, 2009թ. «Քրոնիկոն» ստեղծագործության համար՝ ՀՀ Պետական մրցանակի, 2010թ.՝ Ռուսաստանի Հայերի միության և ՀՀ սփյուռքի նախարարության մրացանակին, 2011թ.՝ Հայաստանի արվեստի վաստակավոր գործչի կոչման, 2014թ.՝ Վահան Թեքեյանի անվան մրցանակի, 2016թ.՝ ՀՀ մշակույթի նախարարության, 2017թ.՝ Երևանի քաղաքապետարանի ոսկե մեդալների:
 

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար