ԿԱՐԵՆ ՇԱՀԳԱԼԴՅԱՆ

Ծնվել է 1976թ. դեկտեմբերի 22-ին, Մոսկվայում: 5 տարեկան հասակից զբաղվել է երաժշտությամբ և հանդես եկել բազմաթիվ բեմերում: Ավարտել է Մոսկվայի Պ.Չայկովսկու անվան պետական կոնսերվատորիան` պրոֆեսոր Վ.Տրետյակովի դասարանը: 2003թ. ավարտել է նաև կոնսերվատորիայի ջութակի բաժնի ասպիրանտուրան` պրոֆեսոր Մ.Գլեզարովայի ղեկավարությամբ: Մասնակցել է Յ.Մենուհինի, Վ.Սպիվակովի, Գ.Ժիսլինի վարպետության դասերին: 1998-2002թթ հանդես է եկել Վլադիմիր Սպիվակովի ղեկավարած «Մոսկվայի Վիրտուոզներ» անվանի նվագախմբի կազմում: 2003-04թթ և 2004-05թթ համերգաշրջաններում, որպես մենակատար, հանդես է եկել տարբեր նվագախմբերի հետ` նվագելով Ստրադիվարիուսի ջութակի վրա, որ տրամադրել էր նրան Ռուսաստանի Դաշնության մշակույթի նախարարությունը: 1997թ. դարձել է Դավիդ Օյստրախ, Յուրի Յանկելեվիչ հիմնադրամների, ինչպես նաև Մստիսլավ Ռոստրոպովիչ միջազգային հիմնադրամի կրթաթոշակառու: 1999թ. Իսպանիայում դարձել է Պաբլո Սարասատեի անվան միջազգային մրցույթի դափնեկիր: Նվագում է Արամ Խաչատրյանի անվան եռյակում: Հյուրախաղերով հանդես է եկել ԱՄՆ-ում, Շվեդիայում, Հարավային Կորեայում, Հայաստանում և Ռուսաստանում: