ԷԼՎԻՆԱ ՄԱԿԱՐՅԱՆ

16 օգոստոս, 1950 - 9 հուլիս, 2007

Ծնվել է Երևանում: 1957թ-ից հաճախել է Երևանի Սայաթ-Նովայի անվան երաժշտական դպրոց: 1962թ. մասնակցել է դպրոցական քաղաքային օլիմպիադային, որտեղ առաջին հաղթանակն է ունեցել: Հիմնականում կատարել է Շառլ Ազնավուրի և Ռոբերտո Լորետիի երգերը՝ դաշնամուրով նվագակցելով ինքն իրեն: Կոմպոզիտոր Մարտին Վարդազարյանը նկատելով երգչուհու տաղանդը, նրան հրավիրել է իր նորաստեղծ ջազային քառյակ, որի կազմում առաջին անգամ ելույթ է ունեցել հեռուստատեսությամբ: Հետագայում կոմպոզիտոր Ռոբերտ Ամիրխանյանից առաջարկ է ստացել` երգել նրա «Կռունկ» վոկալ-գործիքային անսամբլում, որտեղ էլ կատարելագործվել է որպես ջազային երգչուհի: 1967թ. Հայաստանի պետական էստրադային նվագախմբի գեղարվեստական ղեկավար Կոնստանտին Օրբելյանը, լսելով աղջկա հզոր ձայնը, նրան հրավիրել է իր անսամբլ, որից հետո սկսվել են արտասահմանյան շրջագայությունները: Երգչուհին տիրապետել է անգլերեն, ռուսերեն, ֆրանսերեն և իտալերեն լեզուներին, առնչվել համաշխարհային մշակույթի և օտարազգի երաժիշտների հետ: 1973թ. Մոսկվայի Օստանկինոյում կայացած «Երիտասարդ ձայներ» համամիութենական մրցույթում արժանացել է գլխավոր մրցանակի` Ռ.Ամիրխանյանի «Ուր եք, տղաներ» երգի կատարման համար: Աշխատելու հետ մեկտեղ սովորել է Երևանի Կոմիտասի անվան պետական կոնսերվատորիայի դաշնամուրային բաժնում: 1970-ականներից մասնակցել է միջազգային բազմաթիվ փառատոների, ելույթ ունեցել աշխարհի տարբեր բեմերում: Խորհրդային տարիներին երգիչները պայքարել են երգելու իրավունքի համար, իսկ Էլվինա Մակարյանը՝ երգելու ձևի, ոճի և թեմատիկայի համար: Երգչուհին սիրահարված է եղել ամերիկյան ջազին, որի պատճառով 1980-ականներին ՀԽՍՀ Կոմկուսի Կենտկոմը փաստորեն «տնային կալանքի» է ենթարկել նրան՝ վճարելով աշխատավարձ՝ աշխատանքի չգնալու պայմանով: 1989թ. տեղափոխվել է ԱՄՆ, որտեղ թողարկել է երեք ձայնասկավառակ, բացել սեփական ստուդիան, նկարահանել տեսահոլովակներ, գրել երգեր: 1990-ականների սկզբներին վերադարձել է Երևան, որտեղ թողարկել է մի քանի հիթեր` «Յարո ջան», «Երևան»: Մինչև 1990-ականների վերջ բնակվել և ստեղծագործել է Երևանում, որից հետո ընդմիշտ տեղափոխվել է Լոս Անջելես, որտեղ շարունակել է ստեղծագործել սեփական ստուդիայում: Ինքնասպան է եղել Լոս Անջելեսի իր տանը և կտակել է` իրեն այրել ու մոխիրը հանձնել օվկիանոսին: