ԵՐԵՎԱՆԻ ԲՈՒՍԱԲԱՆԱԿԱՆ ԱՅԳԻ

Երևանի Բուսաբանական այգին հիմնադրվել է 1935թ. անվանի գիտնականներ Ա.Մաղաքյանի, Ա.Հախվերդովի և Ն.Միրզոյևայի կողմից: Տարածքը՝ 80 հա, ունի 1100 բուսատեսակ: ՀՀ ԳԱԱ Բուսաբանության ինստիտուտին կից Երևանի Բուսաբանական այգին ունի իր բաժանմունքները Վանաձորում (1935թ.) և Սևանում (1944թ.): Բուսաբանական այգին գիտահետազոտական, կրթական և մշակութային հաստատություն է, որտեղ մշակվում և ուսումնասիրվում են կենդանի բույսերի հավաքածուներ: Վերջիններս աճեցվում են բաց տարածություններում և ջերմատներում, օգտագործվում են ցուցադրման ու գիտահետազոտական նպատակներով: Բուսաբանական այգիները կենդանի թանգարաններ են, որտեղ ցուցադրվում են երկրագնդի բուսականության կարևոր ներկայացուցիչներ: Բուսաբանական այգում հավաքված բուսական ֆոնդերն օգտագործվում են ուսանողների ու դպրոցականների ուսուցման և բնակչության բուսաբանական գիտելիքները հարստացնելու նպատակով: Երևանի բուսաբանական այգում մինչև 1992 թ. գործում էր ջերմատուն, որտեղ ներկայացված էին արևադարձային և մերձարևադարձային բույսերի 1260 տեսակ: Այժմ տեսականու թիվը հասնում է 300-ի: Երևանի բուսաբանական այգու կազմի մեջ մտնում է նաև 4 դենդրարիում: Դենդրարիումը կամ դենդրոպարկը հողամաս է, որտեղ տեղաբաշխված են բաց գրունտի պայմաններում աճող ծառերի, թփերի և փաթաթվող բույսերի հավաքածուներ, որոնք ստեղծվում են կարգաբանական, աշխարհագրական, էկոլոգիական, գեղազարդիչ և այլ հատկանիշներով: Երևանի բուսաբանական այգու դենդրարիումը ստեղծվել է էկոլոգաաշխարհագրական սկզբունքով: Այստեղ տեղաբաշխված են Կովկասի, Ղրիմի, Սիբիրի, Արևելյան Ասիայի (Չինաստան, Ճապոնիա, Կորեա, Հեռավոր Արևելք), Հյուսիսային Ամերիկայի և Եվրոպայի դենդրոֆլորաների ներկայացուցիչներ: ՀՀ-ում կան նաև ինքնուրույն դենդրարիումներ. օրինակ՝ Ստեփանավանի «Սոճուտ», Վանաձորի «Վանաձոր», Իջևանի «Մերձարևադարձային», Բերդի «Սորաներ», Ախթալայի, Բագրատաշենի, Բյուրականի աստղադիտարանի և «Ջերմուկ» առողջարանի դենդրոպարկերը: Այգու կենտրոնական մասում է գտնվում 2000մ քառ. մակերեսով կոլեկցիոն վարդանոցը, որտեղ ներկայացված են վարդի 20 տեսակներ՝ շուրջ 800 թուփ: Բարեկարգվել և ձևավորվել է կոլեկցիոն վարդանոցի մերձակա մոտ 1 հա տարածքը, որտեղ տնկվել է 40 անվանում ներկայացնող ավելի քան 1000 հատ ծառաբույս:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար