ԱԴՐԻՆԵ ՏԱՏՐՅԱՆ

26 դեկտեմբեր, 1913 - 21 փետրվար, 2002

Ծնվել է Արևմտյան Հայաստանի Սեբաստիայի նահանգի Չորում գյուղում: Նախնական կրթությունն ստացել է Տատյան վարժարանում: 1926թ. ավարտել է Կ.Պոլսի Գատըգյուղի Արամյան վարժարանը, այնուհետև մեկ տարի սովորել Նոտր դամ դը Սիոն ֆրանսիական դպրոցում։ Աշակերտել է Սիպիլին: 1967թ-ից ապրել է Փարիզում, 1974թ-ից՝ Նիսում։ Վաղ հասակից թղթակցել է սփյուռքահայ հասարակական, քաղաքական ու գրական հանդեսներին։ Խմբագրել է «Պարտեզ» ամսաթերթը։ Երկրորդ համաշխարհային պատերազմի տպավորություններն են արտացոլված «Մարդկային հուշագրություններ» շարքում, որը պարբերաբար տպագրվել է «Ժամանակ» թերթում (1945թ.)։ Հրատարակվել են նրա «Մայթերուն վրա» (1955թ.), հիտլերականների ոճրագործությունները պատկերող «Գեհենի ճամբուն վրա» (1966թ.), «Չորրորդ մը կը փնտրվի» (1971թ.) և «Հեղինակ, կեցի՛ր» (1980թ.) վեպերը։ Գրել է նաև պիեսներ, վիպակներ, թատերգություններ։ Հանդես է եկել Անուշ-Մանուշ, Արծվիկ, Զունի, Կապույտ Հանին, Հայ աղջիկ, Շափյուղա, Վարդին Արաքս, Տատ, Ատրին և այլ ծածկանուններով: Մահացել է Ֆրանսիայի Նիս քաղաքում: