ՉԻԿ ՏԱՄԱՏՅԱՆ

6 օգոստոս, 1919 - 30 հուլիս, 1985

Խաչիկ Տամատյան

Ծնվել է Ռումինիայի Կոնստանցա քաղաքում: 1931-37թթ սովորել է Վենետիկի Մուրատ-Ռափայելյան վարժարանում, 1937-41թթ՝ Հռոմի Գեղարվեստի ակադեմիայում։ Ապրել և ստեղծագործել է Բուխարեստում։ Հեղինակել է ծաղրանկարներ, շարժեր, գրաֆիկական դիմանկարներ ու բնանկարներ, կատարել է գրքերի նկարազարդումներ։ 1947թ-ից աշխատակցել է Ռումինիայի գրեթե բոլոր հիմնական, ինչպես և «Նոր կյանք», «Սևան» հայկական ու շուրջ 20 արտասահմանյան երկրների պարբերականների։ Նրա գործերը տպագրվել են նաև խորհրդային պարբերականներում («Պրավդա», «Իզվեստիա», «Լիտերատուրնայա գազետա», «Օգոնյոկ», «Կրոկոդիլ», «Սովետական արվեստ», «Ոզնի», «Սովետական գրականություն» և այլն)։ 1975-81թթ ստեղծել է Բոտոշանի, Բուխարեստի, Կոնստանցայի և այլ քաղաքների պատմաճարտարապետական հուշարձաններին նվիրված գծանկարների շարքեր, որոնք ցուցադրել է բազմաթիվ պատկերահանդեսներում (Երևանում՝ 1978թ.), հրատարակել առանձին գրքով («Բուկերեշչի», 1978թ.)։ Լույս են տեսել նրա «Հակաիմպերիալիստական ծաղրանկարներ» (1960թ.), «Բազմալեզու կատակերգություն» (1976թ., նաև ԳԴՀ-ում, գերմաներեն, 1976թ.) ծաղրանկարների ալբոմները։ Նկարազարդել է գրքեր (դրանց թվում՝ Հ.Պարոնյանի հատընտիրը, 1965թ., ռուսերեն, Ա.Բեքարյանի հետ)։ Կատարել է ներկայացումների ձևավորումներ։ Ունեցել է 24 անհատական ցուցահանդես (Փարիզում, 1958թ., Սվերդլովսկում, 1959թ., Երևանում, 1959թ., 1961թ., 1978թ., Օսակայում, 1966թ. և այլն)։ Արժանացել է մի շարք միջազգային մրցանակների, 1950թ. և 1952թ.՝ Ռումինիայի պետական մրցանակի։ Մահացել է Բուխարեստում:

ԲԱԺԻՆՆԵՐ

• ԱՐԱԿԱՆ
• ԻԳԱԿԱՆ
• ՄԱՆԿԱԿԱՆ

ՄԱՍՆԱԿՑԻՐ ՔԱՍԹԻՆԳԻ