ԳՈՒՐԳԵՆ ԳԱԲՐԻԵԼՅԱՆ

27 հունվար, 1862 - 12 հոկտեմբեր, 1898

Ծնվել է Թիֆլիսում: Նախնական կրթությունն ստացել էտեղի դպրոցում: Հետագայում սովորել է Պետերբուրգի վեցերորդ գիմնազիայում, որն ավարտել է 1880թ.: 1881-84թթ ազատ ունկնդիր է եղել Պետերբուրգի գեղարվեստի ակադեմիայում: 1888թ. հիշյալ ակադեմիայի ռազմանկարի դասարանում կատարած ձիու էտյուդի համար նրան շնորհվել է երկրորդ կարգի արծաթե մեդալ։ Ստեղծել է հայկական կյանքին նվիրված պատկերներ, սակայն այդ կտավների գտնվելու վայրը անհայտ է: Ծննդավայրում կարճ ժամանակ ստեղծագործելուց հետո մեկնել է Պետերբուրգ՝ ուսումը շարունակելու: 1889թ. սովորել է մոդելի դասարանում, սակայն հիվանդության պատճառով ընդհատել է ուսումը: 1893թ. նրան թույլ է տրվել մասնակցելու ակադեմիական ցուցահանդեսին՝ նկարչի կոչում ստանալու համար: Ցուցահանդեսին ներկայացրել է «Իջևան Կովկասում» և «Կազակային պահակակետ» էտյուդները: Դրանց հիման վրա արժանացել է «ոչ դասական նկարչի» կոչման: Մահացել է Պետերբուրգում: