ԱՆՆԱ ՊԵՏՐՈՍՅԱՆ

10 մարտ, 1935 - 28 հուլիս, 2017

Անելկա Պետրոսյան

Ծնվել է Լենինականում (այժմ` Գյումրի): Եղել է դերասան Լևոն Թուխիկյանի կինը: 1957թ. ավարտել է Երևանի գեղարվեստաթատերական ինստիտուտը: 1966-85թթ եղել է Երևանի Հ.Ղափլանյանի անվան պետական դրամատիկական թատրոնի դերասանուհի: Խաղացած դերերից են՝ Ժ.Անույի «Մեդեա» (Մեդեա), Վ.Շեքսպիրի «Ռիչարդ Երրորդ» (Թագուհի), Ա.Պետրոսյանի «Ամազոնուհիներ» (Ռոդոպիս) և այլն: Եղել է Հայաստանի թատերական գործիչների միության, 1975թ-ից՝ Հայաստանի գրողների միության անդամ: 1978թ. Երևանի դրամատիկական թատրոնը բեմադրել է նրա «Ամազոններ» ողբերգությունը: Հրատարակվել են նրա «Որպես հացն հանապազօրյա» (1971թ.), «Կումարի Մեծ Տիկնոջ պատմությունները» (1990թ.) վեպերը, «Եկա, որ մնամ» (1986թ.) պիեսների ժողովածուն։ Գրողի հեղինակած դրամատիկական պիեսներից բեմադրվել են թատրոններում, հեռուստատեսությամբ, ռադիոյով: Հայկական հեռուստատեսությամբ բեմադրվել են նրա «Խոր ջրհորներ», «Հանիր, խնդրում եմ, դիմակս», «Սիզիփոսի քարը» ժամանակակից և «Աբգար դպիր Թոխատեցի», «Եկա, որ մնամ», «Երկար վերադարձ» (Արշիլ Գորկու մասին) պատմական թատերգությունները: 1985թ. Լենինականում հիմնադրել է իր գեղագիտական խնդիրներով նախօրինակը չունեցող Առասպելի դպրաթատրոնը, որտեղ մինչև 1992թ. եղել է գեղարվեստական ղեկավարը, բեմադրիչն ու տնօրենը: Թատրոնին կից դպրոցում թատերական արվեստին առնչվող դերասանի վարպետություն, խոսքի արվեստ առարկաներից բացի դասավանդել է «Հայ ժողովրդի պատմություն», «Համեմատական առասպելաբանություն», «Հայոց լեզու և բանաստեղծություն», «Հին ու նոր հայ և արտասահմանյան մշակույթ» առարկաները: Բեմադրել է նաև իր հեղինակած «Մենուա», «Ինչպես Շարան եկավ Շիրակ» (1986թ.), «Տիրամոր ճիչը» (1989թ.), «Զվարթնոց» (1990թ., բացօթյա՝ Զվարթնոցի տարածքում), «Բանտախուց 7160» (1999թ.), «Արտոնված եղեռն» (2005թ.) թատերգությունները: Հրատարակված երկերից են նաև՝ «Եղեռապատում» (փաստագրություն, 2002թ.), «Սերն աշխարհեն խռովել, կերթա» (վեպ, 2004թ.), «Մոզ քաղաքի կործանումը» (վեպ, 2004թ.), «Բոլոր Ժամանակների Հայաստանը» (վկայագիրք Ա-Է հատորներ, 2008-11թթ), «Զրույցներ հայոց բնավորության մասին» (2012թ.): 2010թ. արժանացել է ՀԳՄ «Գրական վաստակի համար» մեդալի։ Մահացել է Երևանում: