ԱՇՈՏ ԱԴԱՄՅԱՆ

Դերասան, բեմադրիչ

Ծնվել է 1953թ. փետրվարի 14-ին, Երևանում: 1972թ. ավարտել է Երևանի Ա.Թամանյանի անվան շինարարական տեխնիկումի ճարտարապետական բաժինը: 1975-79թթ սովորել է Երևանի Խ.Աբովյանի անվան մանկավարժական ինստիտուտի ռեժիսորական բաժնում` Հենրիկ Մալյանի արվեստանոցում: 1987թ. ընդունվել է Մոսկվայի կինոռեժիսորների և սցենարիստների բարձրագույն կուրսեր` Ռոլան Բիկովի արվեստանոց, և ստացել կինոբեմադրիչի մասնագիտություն: Վաղ հասակում նվագել է հայկական առաջին ռոք խմբերում` «Սարդեր», «Առաքյալներ», «1+2»: Դերասանական գործունեությունը սկսել է ուսանողական տարիներից, երբ նկարահանվել է Արման Մանարյանի «Եվս 5 օր» գեղարվեստական ֆիլմում: Հետագայում խաղացել է ավելի քան 20 ֆիլմերում, որոնցում եղել է գլխավոր դերակատար` Հ.Մալյանի «Կտոր մը երկինք» (Թորիկ), Ա.Մկրտչյանի «Հին օրերի երգը» (Օբերոն), Գ.Մելիք-Ավագյանի «Վերադարձման գինը» (Հայկ Մայդերոսով), Ա.Էգոյանի «Օրացույց» (Գիդ-վարորդ), Բ.Հովհաննիսյանի «Տերը» (Վարորդ), Ռ.Քոչարի «Արահետ» (Տիգրան և Աշոտ), Խ.Չալիկյանի «Սև սպիտակ ծիածան» (Պողիկտոս), Դ.Մաթևոսյանի «Թշնամիներ» (Յուսուֆ), Խ.Չալիկյանի «Անպոչ ճգնավոր» (Տիրան) և այլն: Արժանացել է մրցանակների և հատուկ դիպլոմների: 1980թ. հանդիսացել է Հենրիկ Մալյանի անվան թատրոնի հիմնադիրներից, որտեղ աշխատել է որպես բեմադրող ռեժիսոր և դերասան, հետագայում` գեղարվեստական ղեկավար: Բեմադրել է Դ.Դեմիրճյանի «Քաջ Նազար», Ժ.Անույի «Օրկեստր», Դ.Ալիգերիի «Աստվածային կատակերգություն» ներկայացումները: 1982թ-ից Հայաստանի կինեմատոգրաֆիստների միության, 1997թ-ից` «AMFA» հայ կինոգործիչների միջազգային կազմակերպության անդամ է: 1996թ. ձայնագրել է առաջին «Դլե մը կոնդե» երաժշտական ալբոմը, որը ներկայացնում է հայկական ժողովրդական հին երգերի մշակումներ: 1998թ. Լոս Անջելեսում բեմադրել և խաղացել է Խ.Արամունու «Պողոս քեռու այցը», 2005թ. Երևանում` Սլեյդի «Ամեն տարի նույն օրը» պիեսները: 2002թ. Վիեննայում մասնակցել է «Տրուբադուրներ» փառատոնին` ներկայացնելով «Հայկական ժողովրդական երգը մինչև Սայաթ-Նովա և նրանից հետո» ծրագիրը և Վիեննայի սիմֆոնիկ նվագախմբի հետ համատեղ իրականացրել է Սայաթ-Նովայի «Թամամ աշխարհ պտուտ եկա» երգի մշակումը: 2008թ. եղել է «Ոսկե Ծիրան» կինոփառատոնի ժյուրիի անդամ, Թեհրանում իրականացրել է Վիլյամ Սարոյանի 100-ամյակին նվիրված «Ուզենք, չուզենք, հայ ենք» ներկայացումը, անցկացրել է արվեստի դասընթացներ: 2009թ. խաղացել է Հ.Մաթևոսյանի «Մեծամոր» մոնոներկայացման մեջ և «Տղամարդու լավագույն դերակատարման համար» արժանացել է ՀԹԳՄ «Արտավազդ» մրցանակի: Զբաղվել է հայկական ժողովրդական հեքիաթների մշակմամբ: 2010թ. «Մենք ենք, մեր սարերը» ֆիլմի 40-ամյակի կապակցությամբ, Դ.Մաթևոսյանի հետ համատեղ նկարահանել է «Մենք ենք…» ֆիլմը:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար