ԳԵՎՈՐԳ ՉԵՓՉՅԱՆ

25 սեպտեմբեր, 1927 - 12 հունվար, 2016

Ծնվել է Դոնի Ռոստովում: 1944-48թթ սովորել է Երևանի նորաբաց թատերական ինստիտուտում` Վարդան Աճեմյանի արվեստանոցում: 1948թ-ից աշխատել Երևանի Հ.Պարոնյանի անվան երաժշտական կոմեդիայի պետական թատրոնում` որպես դերասան: 1954թ., Վարդան Աճեմյանի հրավերով, տեղափոխվել է Երևանի Գ.Սունդուկյանի անվան ազգային ակադեմիական թատրոն: Խաղացել է բազում դերեր մի շարք ներկայացումներում` Ա.Շիրվանզադեի «Նամուս» (Սեյրան), «Քաոս» (Արշակ), Ա.Կրոնինի «Բրոուդիի ամրոցը» (Մետ), Վ.Շեքսպիրի «Ռոմեո և Ջուլիետ» (Պարիս), Ֆ.Դոստոևսկու «Ապուշ» (Գանյա), Ա.Օստրովսկու «Կատաղի փողեր» (Գլումով), Հ.Պարոնյանի «Պաղտասար ախպար» (Երկաթ), Ժ.Հարությունյանի «Հարսնացուն հյուսիսից» (Երվանդ), Զ.Դարյանի «Հանրապետության նախագահը» (Վարժապետ), Ն.Զարյանի «Հացավան» (Աղաս), Պ.Զեյթունցյանի «Ոտքի դատարանն է գալիս» (Լեմբերգ) և այլն: Նկարահանվել է «Հայֆիլմ» կինոստուդիայի «01-99», «Նվագախմբի տղաները», «Արշակ», «Ոսկե ցլիկ», «Մոսֆիլմ» կինոստուդիայի «Սաննիկովի երկիրը», «Коней на переправе не меняют», «Լենֆիլմ» կինոստուդիայի «Ոսկե ական», «Սվեռլովֆիլմ» կինոստուդիայի «Դեղն ընդդեմ վախի» և այլ գեղարվեստական ֆիլմերում: Կերտել է բազում դերեր հեռուստաթատրոնում: 1996թ. դասավանդել է Երևանի Խ.Աբովյանի անվան պետական մանկավաժական համալսարանի կուլտուրայի ֆակուլտետի ռեժիսուրայի բաժնում: Արժանացել է մի շարք պարգևների և պրոֆեսորի կոչման: Բազմիցս ներկայացրել է հայ թատրոնը և մշակույթը արտասահմանյան տարբեր երկրներում: Հեղինակել և տպագրել է 2 գիրք` նվիրված իր ուսուցիչ Վարդան Աճեմյանին` «Արվեստը` բարեկամության կամուրջ» և «Ռեժիսորը` կարոտը սրտում»: 1971թ. արժանացել է Հայաստանի վաստակավոր արտիստի կոչման: Մահացել է Երևանում: