ԱՇՈՏ ԼՈՒՍԵՆՑ

Բանաստեղծ, թարգմանիչ

11 սեպտեմբեր, 1911 - 8 հոկտեմբեր, 1986

Աշոտ Ղարագյոզյան

Ծնվել է Ելիզավետպոլի նահանգի Արեշի գավառի Հավարիք (այժմ՝ Ադրբեջանում) գյուղում: 1918թ. ընտանիքի հետ տեղափոխվել է Ռուսաստանի Արմավիր քաղաք: 1925թ. ավարտել է Արմավիր քաղաքի Մ.Նալբանդյանի անվան հայկական դպրոցը, 1929թ.՝ Դոնի Ռոստովի Ա.Մյասնիկյանի անվան հայկական մանկավարժական տեխնիկումը: 1929-32թթ հայոց լեզու է դասավանդել Արմավիրի և Սոչիի հայկական դպրոցներում: Սկզբում ունեցել է երկու գրական անուն՝ Բայլեր (Բայրոն անվան առաջին մասի և Շիլլեր անվան երկրորդ մասի մեկտեղումը) և Լուսենց՝ (լույս բառարմատով հորինված ազգանուն): Հետագայում նախապատվությունը տվել է Լուսենցին և հայտնի դարձել Աշոտ Լուսենց անունով: 1932թ. աշխատել է Դոնի Ռոստովի «Գրոհ» հայկական թերթում: 1933-34թթ ծառայել է խորհրդային բանակում: 1934-37թթ աշխատել է «Խորհրդային Հայաստան» օրաթերթում: 1941թ. ավարտել է Երևանի պետական համալսարանի բանասիրական ֆակուլտետը: 1941-46թթ մասնակցել է Երկրորդ համաշխարհային պատերազմին: 1946-59թթ աշխատել է «Գրական թերթ»-ի և «Խորհրդային գրականություն» ամսագրի խմբագրություններում: 1959-72թթ ավագ խմբագիր է եղել «Հայաստան» հրատարակչությունում: 1936թ-ից եղել է Հայաստանի գրողների միության անդամ: Հրատարակվել են նրա «Շինարարության բարիկադներում» (1931թ.), «Երգեր հաղթական վերելքի» (1931թ.), «Երբ խրխնջում են ձիերը» (1932թ.), «Սիրո գիրք» (1948թ.), «Աստղերը կանչում են» (1962թ.), «Հայրենաշունչ» (1969թ.), «Իմ աշխարհը» (1979թ.) երկերը: Ռուսերենից թարգմանել է Ա.Պուշկինի «Երկեր 5 հատորով» (հ.1, 1954թ., հ.2, 1955թ., համահեղինակ), Վ.Լյաշենկոյի «Պատժող քաղաքը» (1964թ.), Չ.Այթմատովի «Երեք վիպակ» (1965թ., համահեղինակ) և այլ երկեր: Մահացել է Երևանում:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար