ԱՇՈՏ ԱՂԱԲԱԲՅԱՆ

Ծնվել է 1959թ. հունվարի 28-ին, ՀՀ Տավուշի մարզի Կողբ գյուղում: Գեղանկարիչ Նիկոլ Աղաբաբյանի եղբայրն է: 1981թ. ավարտել է Երևանի պետական համալսարանի բանասիրական ֆակուլտետը: 1981-85թթ աշխատել է Կողբի թիվ 1 միջնակարգ դպրոցում որպես ուսուցիչ: 1985-87թթ եղել է Նոյեմբերյանի շրջանի ժողկրթբաժնի տեսուչ, 1987-90թթ՝ Նոյեմբերյանի շրջանային «Ծիածան» թերթի բաժնի վարիչ, 1990թ-ից՝ «Հայաստանի Հանրապետություն» օրաթերթի բաժնի վարիչ, 1993թ-ից՝ գլխավոր խմբագրի տեղակալը, 1998-2001թթ՝ գլխավոր խմբագիրը, 2001-02թթ՝ ՀՀ Ազգային Ժողովի հասարակության հետ կապերի վարչության պետի տեղակալը, 2002-04թթ՝ Ռազմավարական և ազգային հայկական կենտրոնի հանրային կապերի վարչության պետը, 2007-10թթ՝ «Հայաստանի զրուցակից» և «Սոբեսեդնիկ» շաբաթաթերթերի գլխավոր խմբագիրը, 2010թ-ից՝ իր հիմնադրած «Հայացք» օրաթերթի գլխավոր խմբագիրը: Գրողի ստեղծագործությունների շարքին են դասվում հարյուրավոր հրապարակախոսական հոդվածներ, ակնարկներ, վեպեր: Հրատարակվել են նրա «Ռեզիդենտ» (2004թ., 2014թ., 2017թ.), «Շախմատիստը» (2009թ., վիպակ), «Մենակը» (2013թ., 2017թ.), «Գաղութ» (2013թ.), «Թակարդ» (2018թ.) և այլն: Հեղինակի «Ռեզիդենտ» աշխատությունը փաստագրական վեպ է, ճանաչվել է որպես «Տարվա գիրք»`«Նոյյան տապան» հրատարակչության մոնիտորինգի արդյունքում: