ԱՇՈՏ ԱՍԱՏՈՒՐՅԱՆ

20 փետրվար, 1937 - 23 մայիս, 1999

Ծնվել է Թբիլիսիում: Եղել է բալետի արտիստ, պարուսույց Էլվիրա Մնացականյանի ամուսինը։ 1967թ. ավարտել է Լենինգրադի (այժմ՝ Սանկտ Պետերբուրգ) Ն.Ռիմսկի-Կորսակովի անվան պետական կոնսերվատորիայի բալետմայստերական բաժինը։ Նրա բեմադրական դեբյուտը եղել է Արիֆ Մելիքովի «Լեգենդ սիրո մասին» լիամետրաժ բալետի բեմադրությունը՝ դիպլոմային աշխատանքը, որը 1968թ. ներկայացվել է Սարատովի Ն.Չերնիշևսկու անվան օպերայի և բալետի թատրոնում։ Նույն թվականին նշանակվել է հիշյալ թատրոնի գլխավոր բալետմայստեր։ Այնուհետև իրար են հաջորդել նրա բեմադրությամբ Պ.Չայկովսկու «Մարդուկ-Ջարդուկ» (1968թ.), Է.Լազարևի «Անտոնիո և Կլեոպատրա» (1971թ.), Ա.Խաչատրյանի «Գայանե» (1972թ.) և այլ բալետներ։ 1972թ. հրավիրվել է Երևանի Ա.Սպենդիարյանի անվան օպերայի և բալետի պետական ակադեմիական թատրոն՝ որպես բալետմայստեր։ 1991-97թթ աշխատել է Խարկովի Ն.Լիսենկոյի անվան ուկրաինական օպերայի և բալետի ակադեմիական թատրոնում որպես գլխավոր բալետմայստեր։ Ստեղծագործական գործունեության 31 տարիների ընթացքում Լենինգրադում, Սարատովում, Սվերդլովսկում (Եկատերինբուրգ), Երևանում, Թբիլիսիում, Չելյաբինսկում, Խարկովում և Բաքվում բեմադրել է 23 բալետ։ Երևանում բեմադրել է Ս.Բալասանյանի «Լեյլի և Մեջնուն» (1973թ.), Կ.Օրբելյանի «Անմահություն» (1975թ.), Մ.Ռավելի «Դափնիս և Քլոե» (1980թ.), Գ.Եղիազարյանի «Արա Գեղեցիկ և Շամիրամ» (1982թ.), Պ.Չայկովսկու «Թեմա վարիացիաներով» (1983թ.), «Հերոսական բալլադ»՝ Ա.Բաբաջանյանի համանուն ստեղծագործության երաժշտության հիման վրա (1985թ.), Ի.Ստրավինսկու «Օրփեոս» (1989թ.) և այլ բալետային ներկայացումներ։ Խարկովում բեմադրել է Ի.Ստրավինսկու «Օրփեոս», «Հրեղեն հավք», Պ.Չայկովսկու «Թեմա վարիացիաներով» (1991թ.), «Մարդուկ-Ջարդուկ» (1992թ.), Ա.Կաներշտեյնի «Եվպրակսիա» (ուկրաինական արվեստի պատմության մեջ է մտել 1994թ. հիշյալ բալետի անդրանիկ բեմադրությամբ), «Սիմֆոնիկ պարեր»՝ Ս.Ռախմանինովի համանուն ստեղծագործության երաժշտությամբ (1997թ.) և այլ բալետներ։ 1978թ. արժանացել է Հայաստանի արվեստի վաստակավոր գործչի կոչման: Մահացել է Երևանում: