ԳՐԻԳՈՐ ՔԵՇԻՇՅԱՆ

12 օգոստոս, 1921 - 14 հունվար, 1980

Ծնվել է Արևմտյան Հայաստանի Ադանա քաղաքում: Սերել է Հայկական Կիլիկիայի Աջապահյան հնամենի տոհմից։ 1935թ. ավարտել է Բեյրութի Սահակյան, 1941թ.՝ Կիպրոսի Մելգոնյան կրթական հաստատությունները։ 1943-46թթ սովորել է Բեյրութի ամերիկյան համալսարանում։ 1946թ. տեղափոխվել է Հայաստան և նույն թվականից դարձել Հայաստանի գրողների միության անդամ։ 1951թ. ավարտել է Երևանի պետական համալսարանի բանասիրական ֆակուլտետը։ Աշխատել է մամուլում և հրատարակչություններում, 1970թ-ից՝ Հայկական խորհրդային հանրագիտարանի գլխավոր խմբագրությունում: Նրա առաջին պատմվածքը («Ծառս ծիրանի») տպագրվել է 1940թ.՝ Նիկոզիայի «Այգ» պարբերականում, առաջին ժողովածուն («Մեծ ճանապարհի վրա»)՝ 1948թ.։ Այնուհետև հրատարակվել են նրա «Պատմվածքներ» (1954թ.), «Քեզնից հեռու, քեզ հետ» (1962թ.), «Տնակը կռունկի վրա» (1975թ.) պատմվածքներ և վիպակներ ամփոփող գրքերը։ Ուշագրավ են գրողի «Կղզի նման չիք մեր Կիպրիա» (1970թ.) վիպակը, որը պատկերում է Մելգոնյան հաստատության պատանիների կյանքը, և «Կտակը» (1981թ.) ժողովածուն։ Գրել է նաև մանուկների համար («Աշխարհի ապագա չեմպիոնները», 1962թ., «Երկնքում շատ աստղեր կան», 1977թ., ժողովածուներ)։ Թարգմանել է Վ.Սարոյանի «Մարդկային կատակերգություն» (1959թ.) վիպակը, «Ջիմ Դենդի» պիեսը («Իմ սիրտը լեռներում է», ժողովածու, 1963թ.), Մ.Տվենի «Թոմ Սոյերի արկածները» (1964թ.) վեպը և այլ գործեր։ Մահացել է Երևանում: