ԼՈՒԻԶ ՆԱԼԲԱՆԴՅԱՆ

12 սեպտեմբեր, 1926 - 2 դեկտեմբեր, 1974

Ծնվել է Սան Ֆրանցիսկոյում: Ավարտել է Սան Ֆրանցիսկոյի համալսարանը։ Դասախոսել է Լոս Անջելեսի Քալիֆորնիա համալսարանում: 1963թ-ից հայագիտություն է դասավանդել Ֆրեզնոյի համալսարանում, որտեղ 1964թ. հիմնել հայագիտական ամբիոն։ Եղել է Հայագիտական համազգային ընկերության (NASSR) անդամ։ Զբաղվել է 19-րդ դարի վերջի հայ ազատագրական շարժման հարցերով, ինչպես նաև հայ մշակույթի պատմության ուսումնասիրությամբ: «Հայ հեղափոխական շարժումը» (1963թ., անգլերեն) աշխատության մեջ քննել է 19-րդ դարի 2-րդ կեսին արևմտահայերի ազատագրական պայքարի պատճառներն ու ընթացքը, հայ քաղաքական կուսակցությունների գործունեությունը, եվրոպական երկրների վերաբերմունքը հայկական հարցին և այլն։ Մահացել է ԱՄՆ-ի Նյումեն քաղաքում՝ ավտովթարից: