ԱՆՆԱ ԽԱՉԱՏՐՅԱՆ

Ծնվել է 1980թ. հունիսի 26-ին, Երևանում: 1997թ. ավարտել է Երևանի Ն.Աղբալյանի անվան թիվ 19 միջնակարգ դպրոցը, 2002թ.՝ Երևանի Վ.Բրյուսովի անվան պետական լեզվաբանական համալսարանի անգլերեն և իսպաներեն բաժինը: 1999թ. եղել է Հայաստանի պետական ջազ նվագախմբի մեներգչուհի: 2000-01թթ երգել է Հայաստանի Երգի պետական թատրոնում: 2004-08թթ աշխատել է Հայաստանի պետական ֆիլհարմոնիայում՝ որպես մեներգչուհի: Մենահամերգներով հանդես է եկել ԱՄՆ-ում, Իրանում, Լիբանանում, Հայաստանում: Հյուրախաղերով եղել է բազմաթիվ երկրներում՝ Ռուսաստան, ԱՄՆ, Իտալիա, Ղազախստան, Իրան, Իսպանիա և այլուր: 1998թ. մասնակցել է Բուլղարիայի «Զոլոտոյ Դիսկ», 2000թ.՝ «Դիսքավրի», Ղազախստանի «Ասիայի ձայն», Ուկրաինայի «Սլավյանսկի Բազար», 2001թ.՝ Չեխիայի «Յունիվերսթալենտ», Զրենյանիկի երգի միջազգային մրցույթ-փառատոներին և արժանացել առաջին մրցանակների, հատուկ դիպլոմի: 2002թ. Հայաստանի ազգային երաժշտական մրցանակաբաշխության ժամանակ արժանացել է «Տարվա լավագույն երգչուհի» մրցանակին: 2005թ. մասնակցել է Իտալիայի «Աշխարհի երգը», 2006թ.՝ Նովոռոսիյսկի «Մորսկոյ Ուզել» երգի միջազգային մրցույթ-փառատոներին և արժանացել առաջին և գլխավոր մրցանակներին: Թողարկել է «Կարոտ» (2003թ.), «Դեպի վեր» (2007թ.), «Տարան, տարան» (2009թ.) ձայնասկավառակները: Նկարահանել է շուրջ 20 տեսահոլովակ: