ԱՐՏԱՎԱԶԴ ՊԱՊԻԿՅԱՆ

Ծնվել է 1936թ. նոյեմբերի 27-ին, Լենինականում (այժմ՝ Գյումրի): 1959թ. ավարտել է Երևանի Փ.Թերլեմեզյանի անվան գեղարվեստի ուսումնարանը, 1966թ.՝ Երևանի գեղարվեստաթատերական ինստիտուտը: Նկարչի ստեղծագործության թեմատիկ առանցքն աշխատավոր մարդու քնարական կերպարն է: 1990-ական թվականներին ստեղծված դիմանկարներին, բնանկարներին, նատյուրմորտներին բնորոշ է նուրբ գունաշարը: Աշխատանքներից են՝ «Բնանկար» (1963թ.), «Մարտիկ» (1976թ.), «Բանվորներ» (1978թ.), «Նամակ» (1983թ.), «Ծերենցի դիմանկարը» (1985թ.), «Հարիսա» (1987թ.), «Նատյուրմորտ» (1990թ.), «Աղջկա դիմանկար» (1993թ.), «Ծաղիկներ» (1994թ.), «Բնանկար» (1997թ.), «Մարմաշեն» (1999թ.), «Նատյուրմորտ» (2002թ.) և այլն: Հեղինակել է հասարակական-քաղաքական կյանքի իրադարձություններից «Սումգայիթ» (1988թ.) կտավը: Ստեղծագործությունները գտնվում են Հայաստանի ազգային պատկերասրահում, Երևանի ժամանակակից արվեստի թանգարանում, Մոսկվայի Տրետյակովյան պատկերասրահում: