ՀՐԱՉՅԱ ՄԵԼԻՔՅԱՆ

8 մայիս, 1947 - 6 մարտ, 2006

Ծնվել է Երևանում: 1967թ. ավարտել է Երևանի Ռ.Մելիքյանի անվան երաժշտական ուսումնարանի կլառնետի, ապա` Էմին Արիստակեսյանի կոմպոզիցիայի դասարանը: 1972թ. ավարտել է Երևանի Կոմիտասի անվան պետական կոնսերվատորիայի կոմպոզիցիայի բաժինը` Էդվարդ Միրզոյանի դասարանը: Ուսանողական տարիներին գրել է սոնատ կլառնետի և դաշնամուրի համար, որի համար արժանացել է Երիտասարդ կոմպոզիտորների 3-րդ համամիութենական մրցույթի մրցանակին: Գրել է «Աբսուրդի վերջը կամ օտար արյուն» օպերան, «Ամբոխները խելագարված», «Ձոն սիրուն» վոկալ-սիմֆոնիկ պոեմները, կոնցերտներ ջութակի և նվագախմբի (1987թ.), թավջութակի և կամերային նվագախմբի (1989թ., 1993թ.), դաշնամուրի և կամերային նվագախմբի (1985թ.) համար, փողային կվինտետներ (1984թ., 1988թ.), փողային կվարտետ (1978թ.), 4 լարային կվարտետ, տրիո կլառնետի, ջութակի և դաշնամուրի (1984թ., Դմիտրի Շոստակովիչի հիշատակին), տրիո ջութակի, թավջութակի և դաշնամուրի (1989թ., Առնո Բաբաջանյանի հիշատակին), տրիո ջութակի, ալտի, թավջութակի և վիբրաֆոնի, «Հեքիաթների աշխարհում» (24 պիես՝ դաշնամուրի համար), «12 նազանքներ»՝ ֆագոտի, 12 պիես թավջութակի և դաշնամուրի, 3 կոնցերտ թավջութակի և նվագախմբի համար սոնատներ, անսամբլներ: Հեղինակել է նաև մի շարք ֆիլմերի երաժշտություններ` «Նվագախումբն անցավ փողոցով» (1976թ.), «Երկնագույն առյուծ» (1979թ.), «Այցելություն» (1979թ., կարճամետրաժ), «Այդքան սպասվող օրը» (1988թ.), «Մենք դեռ կհանդիպենք» (1984թ.), «Հնարամիտ գյուղացին» (1984թ., անիմացիա): Արժանացել է միջազգային տարբեր մրցանակների: 1972թ-ից եղել է Հայաստանի կոմպոզիտորների և երաժշտագետների միության անդամ, 1991թ-ից` միության վարչության անդամ և վարչության պատասխանատու քարտուղարը: Միաժամանակ ղեկավարել է միության «Արճեշ» հրատարակչությունը: 2005թ. արժանացել է ՀՀ Պետական մրցանակի` դաշնամուրի, ջութակի և թավջութակի երեք կոնցերտների համար: Մահացել է Երևանում: