ԳՈՒՐԳԵՆ ՄԻՐԶՈՅԱՆ

20 մայիս, 1892 - 27 նոյեմբեր, 1976

Ծնվել է Թիֆլիսում: Սովորել է Ներսիսյան դպրոցում, աշակերտել Գրիգոր Սյունուն: 1924թ. ավարտել է Թիֆլիսի կոնսերվատորիայի Մ.Իպոլիտով-Իվանովի ստեղծագործական և Քրիստափոր Քուշնարյանի պոլիֆոնիայի դասարանները: 1937-39թթ ղեկավարել է Հայֆիլհարմոնիայի ժողովրդական գործիքների նվագախումբը, մասնակցել Մոսկվայում Հայ արվեստի և գրականության առաջին տասնօրյակին: 1941-43թթ եղել է Երևանի Ռ․Մելիքյանի անվան ուսումնարանի տեսական առարկաների դասատու, 1950-58թթ` նաև ուսումնական մասի վարիչ: Նրա նախաձեռնությամբ երաժշտական ուսումնարանում կազմակերպվել է արևելյան գործիքագիտության և գործիքավորման դասընթաց: Գրել է սիմֆոնիկ («Էսքիզ», «Սյուիտ», 1944թ.), դաշնամուրային («Մանրապատումներ», 1947թ., «Պրելյուդներ», 1949թ.) երկեր, լարային կվարտետ (1950թ.), կոնցերտ թառի (1954թ.), ֆանտազիա քամանչայի (1956թ.), ստեղծագործություններ ժողովրդական գործիքների նվագախմբի համար, երգեր, խմբերգեր: Պարգևատրվել է «Պատվո նշան» շքանշանով: 1950թ. արժանացել է Հայաստանի արվեստի վաստակավոր գործչի կոչման: Մահացել է Երևանում: