ՄԻԽԱԻԼ ԱՎԱԿՈՎ

Բալետի արտիստ, պարուսույց

Ծնվել է 1959թ. հունիսի 19-ին, Երևանում: 1968-78թթ սովորել է Երևանի պարարվեստի պետական ուսումնարանում` Ֆրունզե Ելանյանի դասարանում: 1978-79թթ վերապատրաստվել է Լենինգրադի Ա.Վագանովայի անվան պարարվեստի ակադեմիական ուսումնարանում` Օ.Սոկոլովի դասարանում: Մասնակցել է Ա.Վագանովայի 100-ամյակի գալահամերգին, Կիրովի թատրոնի բալետի աստղերի հետ, պարելով Վագանովայի բեմադրած «Շտրաուսի վալսը»: 1979-92թթ աշխատել է Երևանի Ա.Սպենդիարյանի անվան օպերայի և բալետի ազգային ակադեմիական թատրոնում` որպես առաջատար պարող: Հանդես է եկել հետևյալ բալետային ներկայացումներում` Պ.Չայկովսկու «Կարապի լիճ» (Ծաղրածու), Ա.Ադանի «Ժիզել» (Պադեդե), Ա.Խաչատրյանի «Գայանե» (Կարեն), «Դիմակահանդես» (Շպրիխ), Ս.Պրոկոֆևի «Ռոմեո և Ջուլիետ» (Մերկուցիո), «Համլետ» (Լաերտ), «Իզուր նախազգուշություն» (Ալեն) և այլն: 1980-84թթ զուգահեռ աշխատել է նաև Հայաստանի ռադիոյի և հեռուստատեսության բալետային խմբում: 1992թ. տեղափոխվել է Փարիզ: 1994թ-ից աշխատում է Փարիզի Էթերի Պագավայի բալետային խմբում` որպես առաջատար պարող և փորձավար: Պագավայի բեմադրությամբ կատարել է «Ձյունե թագուհի» (Կայ), «Դարտանյանի երազը» (Դարտանյան), «Արթուր արքա» (Արթուր արքա), «Սիսիի դիմանկարը» (Կայսր), «Նիժինսկի» (Նիժինսկի), «Գեղեցկուհին և հրեշը» (Հրեշ) և այլ դերեր: Ֆրանսիայի տարբեր թատրոններում պարել է նաև Ա.Ադանի «Ժիզել» (Ալբերտ), Պ.Չայկովսկու «Շչելկունչիկ» (Արքայազն), «Քնած գեղեցկուհի», «Սերենադ» (Բալանչինի), «Տարանտելա» և այլ բալետներում: Հյուրախաղերով հանդես է եկել մի շարք երկրներում` ԱՄՆ, Գերմանիա, Իտալիա, Շվեյցարիա, Իսպանիա, Բելգիա, Ռումինիա, Մոնակո, ԱՄԷ: 2005թ-ից դասավանդում է Ֆրանսիայի Անգեն լե Բեն քաղաքի բալետային դպրոցում, 2010թ-ից` Սպորտային գեղարվեստի ինստիտուտում` մարմնամարզության հավաքականի թմին: 2008թ. մասնակցել է Սանկտ Պետերբուրգում կայացած Ա.Վագանովայի անվան ուսումնարանի անցած տարիների աշակերտների գալահամերգին, 2009թ.` Դյագիլևի ռուսական բալետի 100-ամյակի համերգին, «Պիեր Կարդեն» թատրոնում:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար