ԹԱԴԵՎՈՍ ՍԱՐՅԱՆ

Դերասան, բեմադրիչ

28 ապրիլ, 1903 - 23 սեպտեմբեր, 1974

Թադևոս Տեր-Գրիգորյան

Ծնվել է Երևանում: Վաղ տարիքից մասնակցել է աշակերտական ներկայացումների: 1921թ. Երևանում ավարտել է Վարդան Միրզոյանի թատերական ստուդիան, 1921-23թթ Ալեքսանդրապոլում (այժմ` Գյումրի) եղել է Քաղլուսվարի թատրոնի դերասան: 1923-25թթ և 1926-28թթ սովորել է Մոսկվայում` Ռ.Սիմոնովի ղեկավարած հայկական դրամատիկական ստուդիայում: 1923-28թթ կատարելագործվել է Մեյերհոլդի պետական փորձարարական արվեստանոցում: Ուսանելու տարիներին, իբրև դերասան և ռեժիսորի ասիստենտ, աշխատել է Մոսկվայի Մեյերհոլդի անվան պետական և Օրեխովո-Զուևոյի բանվորական թատրոններում: 1928թ. նշանակվել է Լենինականի պետական թատրոնի (այժմ` Գյումրիի Վ.Աճեմյանի անվան դրամատիկական թատրոն) գլխավոր ռեժիսոր: Եղել է թատրոնի հիմնադիրներից, որտեղ ստեղծել է նաև ստուդիա և դասավանդել է դերասանի վարպետություն ու թատրոնի պատմություն: 1930-32թթ եղել է Երևանի Առաջին պետթատրոնի (այժմ` Գ.Սունդուկյանի անվան ազգային ակադեմիական թատրոն) դերասան, 1938-42թթ` ռեժիսոր, 1955թ-ից` դերասան, 1932-37թթ` Բաքվի հայկական, 1942-54թթ` Երևանի Հ.Պարոնյանի անվան երաժշտական կոմեդիայի պետական թատրոնների գլխավոր ռեժիսորը: Բաքվի հայկական թատրոնում հիմնադրել է ադրբեջանական թատերական տեխնիկումի հայկական սեկցիան և ղեկավարել այն: Եղել է նաև Երևանի Հ.Պարոնյանի անվան երաժշտական կոմեդիայի թատրոնի հիմնադիրներից: 1946-48թթ դասավանդել է Երևանի գեղարվեստաթատերական ինստիտուտում: Խաղացել է բազմաթիվ ներկայացումներում` Հ.Պարոնյանի «Մեծապատիվ մուրացկաններ» (Աբիսողոմ աղա), «Պաղտասար աղբար» (Պաղտասար աղբար), «Ատամնաբույժն արևելյան» (Թափառնիկոս), Ա.Շիրվանզադեի «Մորգանի խնամին» (Մինթոև), Ն.Զարյանի «Աղբյուրի մոտ» (Բալաբեկ), Դ.Դեմիրճյանի «Քաջ Նազար» (Նազար), Մովզոնի «Մի խուլ նրբանցքում» (Սուրմաչ), Գ.Տեր-Գրիգորյանի «Գարնան անձրև» (Գարեգին), Մ.Քոչարյանի «Հին հիվանդություն» (Արշակ Բեգլարիչ) և այլն: Մարմնավորած կերպարներում դրսևորել է ժողովրդական փափուկ հումոր, նուրբ տեխնիկա, արտիստական մեծ իմացություն և փորձ: Բեմադրել է Ա.Ֆայկոյի «Պորտֆելավոր մարդը», Ն.Էրդմանի «Մանդատ» (երկուսն էլ` 1929թ.), Աֆինոգենովի «Ահը» (1932թ.), Ա.Օստրովսկու «Անմեղ մեղավորներ» (1939թ.), Հ.Պարոնյանի «Ատամնաբույժն արևելյան» (1942թ.), Տ.Չուխաճյանի «Կարինե» (1943թ.), Կոռնեյչուկի «Պլատոն Կրեչետ», Մ.Ջանանի «Շահնամե» (երկուսն էլ` 1935թ.), Շիլլերի «Սեր և խարդավանք» (1939թ.) և այլ պիեսներ: 1941թ. Գ.Սունդունյանի «Խաթաբալա» պիեսի բեմադրությամբ մասնակցել է մոսկովյան հյուրախաղերին: Նկարահանվել է հայկական ֆիլմերում` «Լեռնային հեղեղ» (1940թ.), «Փեսատես» (1954թ.), «Ամպրոպի արահետով» (1956թ.), «Տերն ու ծառան» (1962թ.) և այլն: Արժանացել է մի շարք պետական պարգևների և մեդալների: 1954թ. արժանացել է Հայաստանի ժողովրդական արտիստի կոչման: Մահացել է Երևանում:

ԲԱԺԻՆՆԵՐ


ՄԱՍՆԱԿՑԻՐ ՔԱՍԹԻՆԳԻ


Նկարահանման փորձ
Կցել նկար