ՏԻԳՐԱՆ ՀԵՔԵՔՅԱՆ

Ծնվել է 1959թ. օգոստոսի 17-ին, Երևանում: Ռեժիսորներ Էլմիրա Հեքեքյանի որդին է, Աննա Հեքեքյանի եղբայրը: 1975թ. ավարտել է Երևանի Սայաթ-Նովայի անվան երաժշտական դպրոցի դաշնամուրի դասարանը, 1979թ.` Երևանի Ռ.Մելիքյանի անվան երաժշտական ուսումնարանի խմբավարության բաժինը, 1982թ.` Երևանի Խ.Աբովյանի անվան հայկական պետական մանկավարժական ինստիտուտի բանասիրության ֆակուլտետը, 1987թ.` Երևանի Կոմիտասի անվան պետական կոնսերվատորիայի խմբավարության բաժինը` ավարտելով նաև ասպիրանտուրան: 1985թ-ից դասավանդում է Երևանի կոնսերվատորիայում (1999թ-ից` պրոֆեսոր): 1984-2002թթ եղել է Հայաստանի ազգային ռադիոյի կամերային երգչախմբի գեղարվեստական ղեկավարն ու գլխավոր դիրիժորը: 1990թ-ից երգչախմբային արվեստի համաշխարհային, 1991թ-ից` «Եվրոպա կանտատ» եվրոպական երգչախմբերի միջազգային ֆեդերացիաների անդամ է: 1993թ. հիմնել է «Հայ փոքրիկ երգիչներ» միջազգային ասոցիացիան, որի նախագահն է և նրա կազմում գործող «Հայաստանի փոքրիկ երգիչներ» մանկական երգչախմբի գեղարվեստական ղեկավարն ու գլխավոր դիրիժորը: Դարձել է բազմաթիվ երգչախմբերի միջազգային մրցույթների ու փառատոների դափնեկիր: 1991թ. Հոլանդիայի Արնհեմ քաղաքում երգչախմբերի միջազգային մրցույթի ժամանակ արժանացել է 3-րդ մրցանակի, 1992թ. Ճապոնիայի Տակարացկա քաղաքում` ոսկե մեդալի և գլխավոր մրցանակի, 1995թ. ԱՄՆ-ի Սան Ֆրանցիսկո քաղաքում` ոսկե մեդալի: 1993թ. Հայաստանում կազմակերպել է «Աշտարակ-93» երգչախմբային արվեստի առաջին միջազգային փառատոնը, որի նախագահն էր: 1994թ. Երևանի Պ.Չայկովսկու անվան երաժշտական դպրոցում հիմնել է վոկալ-խմբավարական բաժին, որտեղ մինչ 2002թ. դասավանդել է դիրիժորի վարպետություն: 1995թ. դասավանդել է ԱՄՆ Քալիֆորնիայի համալսարանում: 1999թ-ից հանդիսանում է Մանկական կատարողական արվեստի միջազգային, 2001թ-ից` Մանկական և երիտասարդական երգչախմբերի եվրոպական ֆեդերացիաների անդամ: 2003թ-ից հանդիսանում է Երևանի Սայաթ-Նովայի անվան երաժշտական դպրոցի տնօրենը: Կազմակերպել է մի շարք միջազգային և տեղական մրցույթներ, փառատոներ: Հանդիսանում է նաև Հանովերի Բնական գիտությունների եվրոպական ակադեմիայի և Բնության ու հասարակության մասին գիտությունների միջազգային ակադեմիայի իսկական անդամ: Թողարկել է Բարսեղ Կանաչյանի ողջ ստեղծագործությունների և 5-20-րդ դարերի հոգևոր երաժշտության ձայնասկավառակները, որոնց համար արժանացել է մրցանակների: 1996թ. արժանացել է ՀՀ «Մովսես Խորենացի» շքանշանի, 2001թ.` Երգչախմբային արվեստի եվրոպական ակադեմիայի կողմից` «Մշակույթի դեսպան Եվրոպայում» տիտղոսին, 2002թ.` Երևանի Պատվավոր քաղաքացու կոչման, 2007թ.` Բնական գիտությունների եվրոպական ակադեմիայի «Լեոնարդո դա Վինչի» արծաթե մեդալի, 2009թ.` ՀՀ ՊՆ «Մարշալ Բաղրամյան» մեդալի, 2010թ.` Հայաստանի վաստակավոր մանկավարժի կոչման և ՀՀ կրթության ու գիտության նախարարության ոսկե մեդալի: